पाकिस्तान बांगलादेश मालिका भारतात दिसणार का?

पाकिस्तानने टी२० वर्ल्डकपमधल्या भारतीय संघाविरुद्धच्या सामन्यावर बहिष्कार घालू असं सूचित केलं होतं. पाकिस्तानने हेका कायम ठेवला. आर्थिक नुकसान, दंडाची शक्यता आणि एकूणच कारवाईचं स्वरुप यामुळे आयसीसीच्या मध्यस्थीनंतर पाकिस्तानने भूमिका बदलली आणि भारताविरुद्धचा सामना खेळला.

पहलगाम हल्ल्यानंतर भारतात पाकिस्तानच्या सामन्यांचं प्रक्षेपण बंद झालं. टी२० वर्ल्डकपपूर्वी दक्षिण आफ्रिकेचा संघ पाकिस्तानच्या दौऱ्यावर होता. या मालिकेचं प्रक्षेपण भारतात झालं नाही. आता पाकिस्तानचा संघ बांगलादेशच्या दौऱ्यावर आहे. सुरक्षेच्या कारणास्तव बांगलादेशने टी२० वर्ल्डकपमधून माघार घेतली होती. बांगलादेशला पाठिंबा देत पाकिस्ताननेही बहिष्काराचा इशारा दिला होता. पाकिस्तानने ही भूमिका बदलत भारताविरुद्ध खेळण्याचा निर्णय घेतला. आता हेच दोन्ही संघ एकमेकांविरुद्ध खेळणार आहेत.

भारतात टीव्हीवर या मालिकेचं प्रक्षेपण होणार नाही. देशात अनेक क्रीडावाहिन्या दिसतात मात्र कोणत्याही कंपनीने या मालिकेचं प्रक्षेपण करण्यात स्वारस्य दाखवलेलं नाही. त्यामुळे टीव्हीवर ही मालिका पाहता येणार नाही. पण फॅनकोड नावाच्या अ‍ॅपवर मालिकेचं प्रक्षेपण होणार आहे. अर्थात यासाठी चाहत्यांना फॅनकोडचं सबस्क्रिप्शन घ्यावं लागेल. फुकट ही मालिका पाहता येणार नाही. पाकिस्तानचा संघ या मालिकेत तीन वनडे सामने खेळणार आहे.

टी२० वर्ल्डकप स्पर्धेत पाकिस्तान संघाचं आव्हान सुपर८ फेरीत संपुष्टात आलं. सलामीच्या लढतीत पाकिस्तानने नेदरलँड्सवर विजय मिळवला. २०२४ मध्ये अमेरिकेने पाकिस्तानला नमवण्याची किमया केली होती. यंदा पाकिस्तानने अमेरिकेला कोणताही चमत्कार घडवण्याची संधी दिली नाही. पारंपरिक प्रतिस्पर्धी भारताविरुद्ध त्यांना पराभवाला सामोरं जावं लागल. नामिबियाविरुद्ध त्यांनी मोठा विजय मिळवला. सुपर८ गटाच्या पहिल्या लढतीत पाकिस्तानची न्यूझीलंडविरुद्धची लढत पावसामुळे रद्द झाली. इंग्लंडने पाकिस्तानला नमवलं. पाकिस्तानने श्रीलंकेला हरवत पुनरागमन केलं. हा सामना जिंकला असला तरी सेमी फायनल प्रवेशासाठी त्यांना गणितीय समीकरणांची साथ आवश्यक होती. मात्र पाकिस्तानला ते गणित जमलं नाही आणि त्यांचं स्पर्धेतलं आव्हान संपुष्टात आलं.

पाकिस्तानने २००९ मध्ये टी२० वर्ल्डकपचं जेतेपद पटकावलं होतं. त्यानंतर त्यांना जेतेपद पटकावता आलेलं नाही.