Vaibhav Sooryavanshi: राजस्थान रॉयल्स नव्हे, तर ‘या’ संघाने लावली होती वैभव सूर्यवंशीवर पहिली बोली

वैभव सूर्यवंशीवर बोली लावणारा संघ दुसरा तिसरा कोणता संघ नसून दिल्ली कॅपिटल्सचा संघ आहे. आयपीएल २०२५ स्पर्धेसाठी जेव्हा लिलाव झाला, त्यावेळी दिल्ली कॅपिटल्स संघाला सलामीवीर फलंदाजाची गरज होती. वैभव सूर्यवंशीची मूळ किंमत ३० लाख रुपये इतकी होती. सर्वात आधी दिल्ली कॅपिटल्स संघाने त्याला संघात स्थान देण्यासाठी हात उंचावला. त्यानंतर मग राजस्थान रॉयल्स संघाने बोली लावली.

ज्यावेळी वैभव सूर्यवंशी लिलावात आला त्यावेळी तो अवघ्या १३ वर्षांचा होता. दिल्ली कॅपिटल्स आणि राजस्थान रॉयल्स या दोन्ही संघांनी बोली लावायला सुरुवात केली. दिल्लीने १ कोटी रुपयांपर्यंत पाठलाग केला. त्यानंतर सोडून दिलं, त्यामुळे वैभव सूर्यवंशी सारखा स्टार फलंदाज राजस्थान रॉयल्स संघात अवघ्या १.१० कोटी रुपयात दाखल झाला.

राजस्थान रॉयल्सने वैभव सूर्यवंशीला संघात स्थान देण्यासाठी १० कोटी रुपये बाजूला काढून ठेवले होते. पण कुठल्याच संघाने त्याचा इतका पाठलाग केला नाही. त्यामुळे राजस्थान रॉयल्सला तो कमी किमतीत मिळाला. त्यावेळी राहुल द्रविड राजस्थान रॉयल्स संघाचे मुख्य प्रशिक्षक होते. युवा खेळाडूंना कसं शोधून काढायचं आणि त्यांना मोठं कसं करायचं हे राहुल द्रविड यांना चांगलंच माहीत आहे. वैभव सूर्यवंशीला संघात तर स्थान दिलं होतं, पण सुरूवातीला त्याला संधी दिली गेली नव्हती. त्यानंतर संधी मिळताच त्याने पहिल्याच चेंडूवर खणखणीत षटकार खेचला होता. त्यानंतर गुजरात टायटन्स संघाविरुद्ध झालेल्या सामन्यात त्याने ३५ चेंडूत वेगवान शतक झळकावलं होतं.