पॅरिस : कर्णधार ख्रिस्तियानो रोनाल्डोच्या हॅट्ट्रिकमुळे पोर्तुगालने विश्वचषक फुटबॉल पात्रता फेरीच्या लढतीत लक्झेम्बर्गचा ५-० असा धुव्वा उडवला. रोनाल्डोने आंतरराष्ट्रीय फुटबॉलमध्ये सर्वाधिक (१०) हॅट्ट्रिकचा विक्रम आपल्या नावे केला. या सामन्यात आठव्या आणि १३व्या मिनिटाला पोर्तुगालला पेनल्टी मिळाली. दोन्ही वेळा रोनाल्डोने चेंडू यशस्वीरीत्या गोलजाळ्यात धाडला. १७व्या मिनिटाला त्याचा मँचेस्टर युनायटेड संघातील सहकारी ब्रुनो फर्नाडेझने गोल केल्याने मध्यंतराला पोर्तुगालकडे ३-० अशी आघाडी होती. उत्तरार्धात जाओ पालहिन्हाने चौथ्या गोलची भर घातली. त्यानंतर रोनाल्डोने संघाचा पाचवा गोल करताना वैयक्तिक हॅट्ट्रिक पूर्ण केली.