भारताचा नवोदीत कुस्तीपटू दिपक पुनियाला जागतिक कुस्ती अजिंक्यपद स्पर्धेत ८६ किलो वजनी गटात रौप्यपदकावर समाधान मानावं लागलं आहे. उपांत्य फेरीत खेळताना झालेल्या दुखापतीमुळे दिपक अंतिम फेरीत खेळूच शकला नाही, ज्यामुळे इराणच्या हझसन याझदानीला सुवर्णपदक बहाल करण्यात आलं. "माझा डावा पाय प्रचंड दुखत आहे. खेळत असताना तो पाय शरीराचा भार पेलवू शकणार नाही हे मला जाणवलं. अशा परिस्थितीत मी खेळू शकणार नव्हतो. माझ्यासाठी ही मोठी सुवर्णसंधी होती, पण माझा नाईलाज आहे." दिपकने पीटीआय वृत्तसंस्थेशी बोलत असताना आपली प्रतिक्रीया दिली. आपल्या पहिल्याच जागतिक अजिंक्यपद स्पर्धेत दिपकने रौप्यपदकाची कमाई केली आहे. उपांत्य फेरीत स्वित्झर्लंडच्या स्टिफन रेचमर्थ याच्याविरोधात खेळताना दिपकला दुखापत झाली होती.
