आफ्रिकेवर ४५ धावांनी मात; कर्णधार धूलची अर्धशतकी खेळी महाराष्ट्राचा डावखुरा अष्टपैलू विकी ओत्सवालने (५/२८) केलेल्या चमकदार कामगिरीच्या बळावर गतउपविजेत्या भारताने युवा एकदिवसीय विश्वचषक क्रिकेट स्पर्धेत (१९ वर्षांखालील) दक्षिण आफ्रिकेचा ४५ धावांनी पराभव करून विजयी सलामी नोंदवली. भारताने दिलेल्या २३३ धावांचा पाठलाग करताना ओत्सवाल आणि वेगवान गोलंदाज राज बावा (४/४७) यांनी आफ्रिकेचा डाव ४५.४ षटकांत १८७ धावांत गुंडाळला. त्यांच्याकडून डेवल्ड ब्रेव्हिसने (६५) अर्धशतकी झुंज दिली. ‘ब’ गटात समावेश असलेल्या भारताची बुधवारी आयर्लंडशी गाठ पडेल. तत्पूर्वी, प्रथम फलंदाजी करताना सलामीवीर स्वस्तात माघारी परतल्यावर यश धूलने १०० चेंडूंत ११ चौकारांसह ८२ धावांची कर्णधाराला साजेशी खेळी साकारली. त्याला महाराष्ट्राचा कौशल तांबे (३५) आणि शेख रशिद (३१) यांनी उत्तम साथ दिली. तरीही भारताचा डाव ४६.५ षटकांत २३२ धावांत संपुष्टात आला. संक्षिप्त धावफलक भारत : ४६.५ षटकांत सर्व बाद २३२ (यश धूल ८२, कौशल तांबे ३५; मॅथ्यू बोस्ट ३/४०) विजयी वि. दक्षिण आफ्रिका : ४५.४ षटकांत सर्व बाद १८७ (डेवल्ड ब्रेव्हिस ६५; विकी ओत्सवाल ५/२८, राज बावा ४/४७) ’ सामनावीर : विकी ओत्सवाल ’ गुण : भारत २, दक्षिण आफ्रिका ०