लहान मूल ज्याप्रमाणे पाय गुडघ्यात दुमडून झोपते, त्याप्रमाणे हे आसन करायचे असल्याने यास बालासन असे म्हणतात. हे आसन करण्यास सोपे असून खूपच लाभदायक आहे. पोटावरील व कंबरेवरील चरबी कमी करण्यासाठी आणि वजन घटवण्यासाठी हे अत्यंत उपयुक्त आसन आहे. हे आसन नियमित केल्याने मानसिक शांतताही लाभते. कसे करावे? * पाय गुडघ्यात दुमडून खाली बसा. कंबर पायाच्या टाचेला लागली पाहिजे अशा स्थितीत बसणे आवश्यक आहे. * आता पुढच्या बाजूस वाकून डोक्यासह सर्व शरीर खाली घ्या. डोके जमिनीला टेकले पाहिजे. * हात पुढील बाजूस किंवा कंबरेच्या मागे घेतले तरी चालतील. * आता छातीने मांडीला दाब द्या. * काही वेळ याच स्थितीत राहा. * हळूहळू शरीर वर घेऊन आसन सोडा.