29 May 2020

News Flash

पुडला, ब्रेड पुडला

मुंबईतल्या मशीद बंदर, काळबादेवी, जव्हेरी बाजार या परिसरात अनेक विशेष पदार्थ मिळतात.

(संग्रहित छायाचित्र)

सुहास जोशी

मुंबईतल्या मशीद बंदर, काळबादेवी, जव्हेरी बाजार या परिसरात अनेक विशेष पदार्थ मिळतात. तिथे वेगवेगळ्या समाजांच्या खाद्यसंस्कृतीचा ठसा या उमटलेला दिसतो. खिचा पापड, दाबेली, फराळी पॅटीस, फाफडा जिलेबी असे कैक प्रकार येथे मिळतात. त्यापैकीच एक थोडा वेगळा प्रकार म्हणजे पुडला आणि ब्रेड पुडला.

येथील पदार्थामध्ये बेसनचा खच्चून वापर असतो. पुडलादेखील बेसनपासूनच केला जातो, मात्र हा पदार्थ न तळता केलेला असल्याने खाण्यास बराच म्हणावे लागेल. पातळसर केलेले बेसन डोश्याच्या तव्यावर डोश्याच्या आकारात पसरवले जाते. त्यावर बटर, थोडी मसाला पावडर टाकली जाते. त्यानंतर आल्याचे अगदी बारीक तुकडे (मटण खिम्याप्रमाणे) आणि वर कोथिंबीर भुरभुरवतात. फार खरपूस, कडक न करता पालटून पुन्हा भाजतात. ब्रेड स्लाइसबरोबर किंवा नुसतेच खाण्यास दिले जाते. दुसरा प्रकार म्हणजे ब्रेड पुडला. यामध्ये ब्रेडचे दोन स्लाइस पिठात बुडवून तव्यावर भाजले जातात. हा काहीसा अंडय़ाच्या फ्रेंच टोस्टसारखा प्रकार. सोबत दोन-तीन प्रकारच्या चटण्या, हवा असल्यास कांदादेखील. तसेही इथे कांदा-लसूण न खाणाऱ्यांची गर्दी अधिक असते.

हा प्रकार मशीद बंदर येथील एका छोटय़ा बोळकंडीत मिळतो. तिथेच खिचा पापड वगैरे रेलचेलदेखील आहे. विशेष म्हणजे इथे जिलेबी आणि बडी गाठी अशी जोड असते. नेहमीपेक्षा चांगलीच जाडसर अशी ही बडी गाठी जोडीला मिरची किंवा मोसमानुसर कैरी. एकदा का या गल्लीत गेलं की पोटभर खाण्याची चैनच असते. आणि महत्त्वाचे म्हणजे ती खिशाला परवडतेही.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on July 5, 2019 12:11 am

Web Title: bread pudla besan abn 97
Next Stories
1 टेस्टी टिफिन : मका कटलेट
2 शहरशेती : कोबी
3 पाऊस आणि ट्विटर
Just Now!
X