खांदा, बाहू आणि हाताचे स्नायू मजबूत होण्यासाठी प्लँक टॅप्स हा व्यायाम केला जातो. हा व्यायाम प्रकार सोपा असला तरी काळजीपूर्वक करावा लागतो. एका हातावर शरीराचा भार येत असल्याने या व्यायामामुळे हाताचे स्नायू बळकट होतात. कसे कराल? * दोन्ही हात जमिनीला टेकवून आणि पाय मागे घेऊन जमिनीवर ओणवे उभे राहा. दोन्ही हातांमध्ये आणि पायांमध्ये काही अंतर ठेवा. * आता उजवा हात उचला आणि डाव्या खांद्यावर ठेवा. (यावेळी तुमच्या शरीराचा सर्व भार डाव्या हातावर असेल.) डाव्या खांद्यावरून हात काढून पूर्वस्थितीत या. * आता डावा हात उचलून उजव्या खांद्यावर ठेवा आणि तात्काळ पूर्वस्थितीत या. खांद्यांना हाताचा स्पर्श करताना श्वास सोडा. * असे पुन्हा पुन्हा करा. या व्यायामामुळे बाहू, खांदा आणि मनगटाच्या स्नायूंवर ताण येतो आणि ते मजबूत होतात. * या व्यायामाने नितंब व पाठीचे स्नायू बळकट होण्यासही मदत होते. हा व्यायाम केल्याने पाठदुखीपासून मुक्ती मिळते.