|| अलका फडणीस साहित्य डाळीचे पीठ २ वाटय़ा, हळद अर्धा चमचा, तिखट १ चमचा, नारळाचे दूध पाव वाटी, धणे-जिरे पूड १ चमचा, तेल तळण्यासाठी, पाणी ३ वाटय़ा, स्वच्छ रुमाल. सारणासाठी ओलं खोबरं २ वाटय़ा (थोडंसं भाजून घ्या), खसखस १ चमचा (भाजलेली), कोथिंबीर १ वाटी (बारीक चिरून), लिंबाचा रस २ चमचे, मीठ आणि साखर चवीप्रमाणे (हे सर्व साहित्य एकत्र करून ठेवा). कृती डाळीच्या पिठात हळद, तिखट, मीठ, साखर, नारळाचे दूध आणि पाणी घालून मिश्रण तयार करा. गुठळ्या होणार नाहीत याची काळजी घ्या. नंतर गॅसवर ठेवून सतत ढवळत राहा. घट्ट झाल्यावर पातेल्याखाली जाड तवा ठेवून झाकण ठेवून त्याला वाफ आणावी. स्वच्छ रुमाल ओला करून पसरा. त्यावर अर्धे मिश्रण घालून नीट पसरवा. त्यावर खोबऱ्याचे सारण पसरून हलक्या हाताने ओल्या रुमालाच्या मदतीने गुंडाळी करा. त्याला त्रिकोणी आकार देऊन फ्रिजमध्ये ठेवून थंड करा म्हणजे नीट वडय़ा पडतील. वडय़ा पाडून तळून खायला द्या.