तंत्रज्ञान क्षेत्रातील दिग्गज कंपनी Apple ने आपल्या कॅलिफोर्नियातील क्यूपर्टिनो येथील स्टीव्ह जॉब्स थिएटरमध्ये आयोजित करण्यात आलेल्या इव्हेंटमध्ये बहुप्रतिक्षित iphone 11 सीरिजचे तीन फोन लाँच केले. अॅपलने iphone 11, iphone 11 Pro आणि iphone 11 Pro Max हे फोन लाँच केले आहेत. iphone 11 च्या बेसिक व्हेरिअंटची किंमत 699 डॉलर्स, iphone 11 Pro च्या सुरूवातीच्या व्हेरिअंटची किंमत 999 डॉलर्स, तर iphone 11 Pro Max च्या सुरूवातीच्या व्हेरिअंटची किंमत 1,099 डॉलर्स ठेवण्यात आली आहे. 64 GB, 128 GB आणि 256 जीबी व्हेरिअंटमध्ये तिन्ही iphone उपलब्ध असतील.

भारतात नवा iphone सप्टेंबर महिन्याच्या अखेरच्या आठवड्यात विक्रीसाठी उपलब्ध होणार आहे. भारतात iphone 11 च्या सुरूवातीच्या व्हेरिअंटची किंमत 64,900 रूपये, iphone 11 Pro च्या सुरूवातीच्या व्हेरिअंटची किंमत 99,900 रूपये आणि iphone 11 Pro Max च्या सुरूवातीच्या व्हेरिअंटची किंमत 1,09,900 रूपये असणार आहे.


iphone 11 चे फीचर्स

iphone 11 मध्ये 6.1 इंचाचा LCD रेटिना डिस्प्ले देण्यात आला आहे. यापूर्वी लाँच करण्यात आलेल्या iphone XR प्रमाणेच हा फोन असेल. या फोनमध्ये एक नॉचही देण्यात आली आहे. सहा कलर ऑप्शनसह हा फोन बाजारात विक्रीसाठी उपलब्ध असणार आहे. यामध्ये पर्पल, व्हाईट, ग्रीन, रेड, ब्लॅक आणि येल्लो कलर्स उपलब्ध असतील. यामध्ये 12 मेगापिक्सेलचे दोन कॅमेरे देण्यात आले असून मेन कॅमेरा वाईड अँगल लेन्स तर दुसरा कॅमेरा अल्ट्रा वाईड अँगल लेन्स असेल. यामध्येही नाईट मोड फीचर देण्यात आले आहे. यात नाईट मोड आपणहून सुरू होत असल्याचा दावा कंपनीने केला आहे. तसंच 64 fps ने याद्वारे 4K व्हिडीओ रेकॉर्डिंग करता येणार आहे. iphone 11 मध्येही नवी A13 Bionic चीप देण्यात आली आहे.


phone 11 Pro आणि iphone 11 Max चे फीचर्स

iphone 11 मध्ये ड्युअल कॅमेरा सेटअप देण्यात आले आहे. तर iphone 11 Pro आणि iphone 11 Pro Max या दोन्ही मॉडेल्समध्ये ट्रिपल कॅमेरा सेटअप देण्यात आले आहे. याव्यतिरिक्त कंपनीने दरवर्षीप्रमाणे यावर्षीही नवी Apple A13 Bionic ही चीप लाँच केली आहे. iphone 11 Pro मध्ये 5.8 इंचाचा OLED डिस्प्ले देण्यात आला आहे. तर iphone 11 Pro Max मध्ये 6.5 इंचाचा डिस्प्ले देण्यात आला आहे. तसंच या सर्व फोनमध्ये A13 Bionic प्रोसेसर देण्यात आला आहे. आतापर्यंतच्या स्मार्टफोनमधील ही सर्वात वेगवान प्रोसेसर असल्याचा दावा कंपनीकडून करण्यात आला आहे. सर्व iphone ची प्री बुकींग 13 सप्टेंबरपासून सुरू होणार असून 27 सप्टेंबरपासून हे विक्रीसाठी उपलब्ध होणार आहेत.



कसा असेल कॅमेरा?

iphone 11 Pro मध्ये कंपनीने डीप फ्युजन कॅमेरा फीचर दिले आहे. याचा वापर लो लाईट फोटोग्राफीसाठी करता येणार आहे. यापूर्वी गुगलने आपल्या फोनमध्ये दिलेल्या नाईट साईट फीचर प्रमाणेच हे फीचर काम करणार आहे. एकावेळी 9 फोटो क्लिक करून मर्ज करण्याचे काम हे फीचर करते. iphone 11 Pro 60fps ने 4K व्हिडीओ शूट करू शकतो. यामध्ये मेन कॅमेरा F 1.8 लेन्ससह 12 मेगापिक्सेलचा देण्यात आला आहे. तर दुसरा कॅमेरा F 2.4 लेन्सह अल्ट्रा वाईड आणि तिसरा 12 मेगापिक्सेलचा F 2.0 लेन्ससह झूम लेन्स कॅमेरा देण्यात आला आहे. याव्यतिरिक्त iphone 11 Pro मध्ये 4x ऑप्टिकल झूमदेखील देण्यात आले आहे.

कशी असेल बॅटरी ?
Apple ने नव्या iPhone मध्ये बॅटरी लाईफ अधिक उत्तम केली आहे. iphone 11 Pro मध्ये iphone 11 XS च्या तुलनेत 4 तास अधिक बॅटरी बॅकअप मिळणार आहे. iphone 11 Pro Max मध्ये iphone XS Max च्या तुलनेत पाच तास अधिक बॅटरी बॅकअप मिळणार आहे. हे दोन्ही फोन मिडनाईट ग्रीन, स्पेस ग्रे, सिल्व्हर/व्हाईट आणि गोल्ड कलरमध्ये मिळणार आहे.

Series 5 वॉच, iPad लाँच
Apple ने आपल्या बहुप्रतिक्षित iphone सह iWatch ची पाचवी सीरिज लाँच केली आहे. याच्या सुरूवातीच्या व्हेरिअंटची किंमत 399 डॉलर्स निश्चित करण्यात आली आहे. तर iWatch सोबतच कंपनीने नवा iPad देखील लाँच केला आहे. iPad 329 डॉलर्समध्ये विक्रीसाठी उपलब्ध असणार आहे. यासोबतच Apple TV Plus सबस्क्रीप्शन 5 डॉलर्स प्रति महिना दराने देण्यात येणार आहे. 100 पेक्षा अधिक देशांमध्ये ही सेवा उपल्बध असणार असून अॅपल कंप्युटींग डिव्हाईस खरेदी करणाऱ्या युझर्सना एका वर्षाचे Apple TV Plus सबस्क्रीप्शन देण्यात येणार आहे.