सुजैविकांनी युक्त असलेले चोथायुक्त अन्न सेवन केल्याने झोपेचा दर्जा सुधारतो, त्यात कच्चा लसूण, कांदा यांचे सेवन उपयुक्त ठरते. तसेच शारीरिक ताणही कमी होतो. असे नवीन संशोधनात म्हटले आहे. सुजैविकांमुळे आतडय़ातील चांगले जिवाणू सुरक्षित राहतात. अमेरिकेतील कोलोरॅडो विद्यापीठातील संशोधक रॉबर्ट थॉमसन यांनी म्हटले आहे की, सुजैविकेयुक्त नैसर्गिक अन्न आरईएमव्यतिरिक्त व आरईएमयुक्त झोप (रॅपिड आय मूव्हमेंट) सुधारते. ताणानंतरही झोपेचा दर्जा चांगला राहतो. कांदा, लसूण यामुळे चांगला फायदा होतो. जेव्हा उपकारक जिवाणू हे पदार्थ पचवतात तेव्हा त्यांची संख्या वाढते व त्यामुळे आतडय़ाचे आरोग्य सुधारून चयापचयातील त्याज्य घटक बाहेर टाकले जातात. संशोधकांनी तीन आठवडे उंदरांवर संशोधन केले असून त्यात त्यांच्या शरीराचे तापमान, आतडय़ातील जिवाणू व झोपेचे चक्र यांचा अभ्यास ईईजी तंत्राने करण्यात आला. ज्यांना प्रिबायोटिक अन्न देण्यात आले. त्यांची एनआरईएम झोप जास्त काळ टिकली. यात डोळे झोपेत जलद हालचाली करीत नाहीत. या उंदरांना ताण दिला असता त्यांची आरईएम झोप चांगली राहिली. जीवनात आधीच्या काळात जर प्रिबायोटिक घेतले तर त्याचा चांगला परिणाम होतो. आरईएम झोप ही ताणाचे दुष्परिणाम टाळणारी असते. या झोपेमुळे मानसिक धक्क्यामुळे होणारे ताणाचे आजार जडत नाहीत. शरीराचे तापमानही यात नियंत्रित राहते. जर्नल फ्रंटियर्स इन बिहॅवरियल न्यूरोसायन्स या नियतकालिकात हे संशोधन प्रसिद्ध झाले आहे.