जगातील एक उंच प्राणी म्हणून जिराफाला ओळखले जाते. याच जिराफाचा जन्म होत असताना उंचीचा वरदहस्तच या प्राण्यावर असतो, हेच सिद्ध करणारा व्हिडिओ यूट्यूवबर लाखो लाइक्स मिळवत आहे. दक्षिण आफ्रिकेच्या 'साबी सॅंड गेम रिझर्व्ह' जंगलातील अशाच एका मादी जिराफाचा तिच्या पिल्लाला प्रसूत करतानाचा व्हिडिओ व्हायरल झाला आहे. चिकित्सकांच्या निगराणीअभावी होणाऱ्या या उभ्या प्रसूतींमध्ये सहसा पिल्लाच्या जीवास धोका असतो, कारण त्या पिल्लाचे वजन ४५ ते ७० किलोदरम्यान असते, शिवाय उंची जवळपास सहा फूट. पंधरा महिन्यांच्या कालावधीनंतर प्रसूत होणारे हे जिराफाचे पिल्लू जन्मताक्षणीच चालू लागतं आणि दिवस पूर्ण होताच धावू-बागडूही लागतं.
