गुगलचे अॅप्स म्हणजे धोकादायक व्हायरस किंवा बग सोडण्यासाठी हॅकर्सचं आवडतं ठिकाण आहे. याचं ताजं उदाहरण म्हणजे लोकप्रिय Google Assistant मध्ये एक 'बग' आल्याची माहिती समोर आली आहे. जगभरातील अनेक अँड्रॉइड युजर्सनी गुगल असिस्टंटमध्ये आलेल्या बगबाबत तक्रार केली आहे. वापर करण्यासाठी गुगल असिस्टंट ओपन करुन 'Hey Google' किंवा 'Ok, Google' बोलताच फोनची स्क्रीन फ्रीज होते व सतत ऑन राहत असल्याची तक्रार अनेकांनी केली आहे. युजरने कितीही प्रयत्न करुनही स्क्रीन ऑफ होत नाही किंवा फोन देखील लॉक होत नाही. याद्वारे फोनची बॅटरी लवकर ड्रेन(बॅटरी संपणे) होते. यामुळे फोनचा डिस्प्ले कायमस्वरुपी खराब होण्याची शक्यताही वाढते. या 'बग'बाबत सप्टेंबर महिन्यातच काही युजर्सनी गुगल सपोर्ट फोरममध्ये तक्रार केली होती. या 'बग'चा सर्वाधिक परिणाम सध्या गुगल पिक्सल स्मार्टफोन्स आणि गुगल होम डिवाइसव्हर होतोय. गुगलकडूनही अद्याप या बगबाबत काही माहिती देण्यात आलेली नाही. त्यामुळे हा 'बग' केव्हापर्यंत फिक्स होणार याबाबत नेमकं सांगता येणं सध्यातरी कठीण आहे. आणखी वाचा : ‘या’ खास फीचरमुळे भारतात लाँच होणार नाही Google Pixel 4 काय होतं या 'बग'मुळे :- या 'बग'मुळे गुगल असिस्टंटशी कनेक्टेड असलेल्या स्मार्ट उपकरणांचा वापर करणाऱ्या अनेक युजर्सना समस्यांचा सामना करावा लागत आहे. या 'बग'मुळे फोनच्या बॅटरीला मोठा धोका असल्याचं सांगितलं जात आहे. यामुळे फोन नेहमी सुरू राहतो आणि लॉक देखील करता येत नाही. 'हे गुगल' बोलताच फोनची स्क्रीन फ्रीज होते. परिणामी युजर्सना अन्य कोणत्याच अॅपचा वापर करता येत नाही.