उन्हाळय़ाच्या दिवसात फळांचा थंडगार रस, सरबत किंवा मिल्कशेक प्यायला सर्वानाच आवडते. फळांचा रस तयार करण्यासाठी ज्यूसरचा वापर केला जातो. त्यामुळे ज्यूसरची नियमित काळजी घेणे आवश्यक आहे. ज्यूसरचा वापर करण्यापूर्वी आणि वापर केल्यानंतर त्याची स्वच्छता करणे गरजेचे आहे. अनेकदा ज्यूसरमध्ये फळांचा उरलेला चोथा राहतो. तो साफ न केल्यास ते आरोग्यासाठी धोकादायक होऊ शकते. फळांचा हा चोथा कुजतो आणि नंतर जर त्या ज्यूसरमधून रस बनवला तर तो आरोग्यासाठी चांगला नसतो. ज्यूसर वेळोवेळी साफ केल्यास त्याचे आयुर्मानही वाढते. फळांचा उरलेला चोथा राहिल्याने ज्यूसरची आतमधील यंत्रणा खराब होऊ शकते. हा चोथा एखाद्या खरखरीत सँडपेपरसारखे काम करतो. त्यामुळे ज्यूसरचे ब्लेड नादुरुस्त होतात. फळांचे उरलेले तंतूमय पदार्थ ज्यूसरमधील सूक्ष्म छिद्रांमध्ये अडकून राहतात. त्यामुळे ज्यूसरची काम करण्याची क्षमता कालांतराने कमी होते. त्यामुळे ज्यूसरची नियमित साफसफाई करणे आवश्यक आहे. ज्यूसर साफ करताना गरम पाणी किंवा प्रभावी डिर्टजटचा वापर करू नका. त्यामुळे ज्यूसरचे रबर पॅड खराब होऊ शकतात. ज्यूसर साफ करण्यासाठी कोमट पाण्याचा वापर करू शकता. या पाण्यात डिशवॉशिंग लिक्विड टाकू शकता. ज्यूसरबरोबर साफ करण्यासाठी ब्रश दिलेला असतो. या ब्रशचाच वापर करून ज्यूसर साफ करू शकता. ज्यूसर साफ करण्यापूर्वी त्याचा वीजप्रवाह खंडित करावा. प्लग काढूनच ज्यूसर साफ करा. साफ केल्यानंतर ज्यूसर स्वच्छ कापडाने पुसून घ्या.
