ओप्पो कंपनीने Oppo Reno 4 Pro हा नवीन स्मार्टफोन काही दिवसांपूर्वीच लाँच केला. आज(दि.5) पहिल्यांदाच या फोनसाठी अॅमेझॉन आणि फ्लिपकार्ट या दोन्ही वेबसाइटवर सेल आहे. याशिवाय ऑफलाइन प्लॅटफॉर्मवरुनही आजपासून हा फोन खरेदी करता येईल. कंपनीचा हा प्रीमियम स्मार्टफोन असून यामध्ये स्नॅपड्रॅगन 720G प्रोसेसरसह क्वॅड रिअर कॅमेरा सेटअप आहे. किंमत - Oppo Reno 4 Pro हा फोन 8GB रॅम आणि 128GB स्टोरेज या एकाच व्हेरिअंटमध्ये लाँच करण्यात आला आहे. कंपनीने 34 हजार 990 रुपये इतकी या फोनची किंमत ठेवली आहे. हा फोन स्टारी नाइट आणि सिल्की व्हाइट अशा दोन कलरच्या पर्यायांमध्ये खरेदी करता येईल. फोनमध्ये लेटेस्ट ऑपरेटिंग सिस्टिम, सुपर AMOLED डिस्प्ले यांसारखे अनेक शानदार फीचर्स आहेत. सेलमध्ये या फोनच्या खरेदीवर काही ऑफरही आहेत. सेलमध्ये काही निवडक बँकांच्या डेबिट किंवा क्रेडिट कार्डवर 10 टक्के कॅशबॅकची ऑफर आहे. याशिवाय ग्राहकांना नऊ महिन्यांपर्यंत नो-कॉस्ट ईएमआयचा पर्यायही मिळेल. फीचर्स - Oppo Reno 4 Pro मध्ये 6.55 इंचाचा फुल एचडी+ सुपर AMOLED वॉटरफॉल डिस्प्ले आहे. सेल्फीसाठी या फोनमध्ये Sony IMX616 सेन्सरसह 32MP क्षमतेचा कॅमेरा आहे. फोनमध्ये इन डिस्प्ले फिंगरप्रिंट स्कॅनर फीचर देण्यात आलं आहे. क्वॉलकॉम स्नॅपड्रॅगन 720G प्रोसेसरसह 8 जीबी रॅम आणि 128 जीबी स्टोरेज मिळेल. तर मागील बाजूला चार कॅमेऱ्यांचा सेटअप आहे. यात 48 मेगापिक्सलचा प्राइमरी सेन्सर, 8 मेगापिक्सलचा वाइड-अँगल लेन्स, 2 मेगापिक्सलचा मोनो आणि 2 मेगापिक्सलचा मॅक्रो लेन्स कॅमेरा आहे. कमी प्रकाशात चांगले फोटो काढता यावे यासाठी फोनमध्ये नाइट फ्लेअर पोर्ट्रेट मोडही आहे. फास्ट चार्जिंगच्या सपोर्टसह 4000mAh क्षमतेची बॅटरी यामध्ये असून कनेक्टिव्हिटीसाठी युएसबी टाइप-सी चार्जिंग पोर्ट आहे.