आपल्या प्रत्येकाच्या आयुष्यात ताण, कामाची दगदग, विविध गोष्टींची गुंतागुंत असते. या सगळ्या कोलाहलातून थोडा वेळ काढणे आणि काही काळ कोणत्याही अडथळ्यांशिवाय स्वत:ला वेळ देणे अतिशय आवश्यक असते. आपण अनेकदा आपल्या जोडीदाराबरोबरचे आयुष्य, सोशल लाईफ याबद्दल बोलतो. पण अनेकदा आपल्याला आपल्या स्वत:ची सोबत जास्त गरजेची असते. ती मिळण्यासाठी ठराविक काळ एकटे राहून स्वत:ला वेळ द्यायला हवा. आता अशाप्रकारे एकटे राहणे ही अनेकांना शिक्षा वाटू शकते. पण तुमचे मानसिक आरोग्य चांगले ठेवायचे असेल तर स्वत:ला पुरेसा वेळ देणे गरजेचे असते. त्यामुळे तुम्ही स्वत:च्या आत डोकवून पाहू शकता आणि तुमची स्वत:शी जास्त छान गट्टी जमू शकते. इतकेच नाही तर स्वत:ला छान वेळ दिलात तर त्याचा तुम्हाला आनंद मिळण्यासाठी नक्कीच फायदा होतो. आता रोजच्या रुटीनमधूनकाही काळ एकटे राहिल्यानी काय फायदे होतात पाहूया. मानसिकदृष्ट्या कणखर होण्यास मदत आपल्यातील सगळेचजण सामाजिक असतात, त्यामुळे सामाजिक स्तरावर चांगली नाती बनवणे महत्त्वाचे असते. पण त्याचबरोबर स्वत:ला वेळ देणेही तितकेच महत्त्वाचे असते. त्यामुळे तुम्हाला आनंद मिळण्यास मदत होते आणि त्यामुळे तुम्ही नकळत कणखर बनता. स्वत:ला स्वत:ची जास्त चांगली ओळख होते आपण जेव्हा स्वत:सोबत वेळ घालवतो तेव्हा आपली आपल्याशी जास्त चांगली ओळख होते. त्यामुळे आपण कोणतेही निर्णय घेताना डगमगत नाही तर कोणत्याही प्रभावाशिवाय आपण निर्णय घेऊ शकतो. तुमच्या गरजा लक्षात घ्या आपण अनेकदा समोरच्याला काय आवडेल याचा विचार करुन गोष्टी करतो. मात्र आपल्याला काय आवडेल किंवा आपली गरज काय आहे याचा विचार करणेही स्वत:च्या आनंदासाठी महत्त्वाचे असते. नातेसंबंध सुधारण्यास मदत हे ऐकून तुम्हाला नक्कीच आश्चर्य वाटेल पण तुम्ही एकटे राहता तेव्हा तुमची नाती जास्त घट्ट होतात. कारण एकटे राहील्यानंतर सामाजिकदृष्ट्या तुम्ही जास्त कनेक्ट होता.
