Acidity & Acid Reflux : ॲसिडिटीचा थेट संबंध आपल्या आहाराशी आणि जीवनशैलीशी असतो. जर तुम्हाला छातीत जळजळ आणि ॲसिड रिफ्लक्सचा त्रास होत असेल, तर तुम्ही खाण्यापिण्याकडे विशेष लक्ष दिले पाहिजे. कदाचित तुम्ही आहारात अशा काही गोष्टींचा समावेश करत असाल, ज्यामुळे तुमचा त्रास आणखी वाढत आहे आणि तुम्हाला याची कल्पनाही नसेल. ॲसिड रिफ्लक्स कमी करण्यासाठी आणि ॲसिडिटीपासून वाचण्यासाठी काय खावे आणि काय खाऊ नये, याबद्दल हार्मोन आणि गट हेल्थ कोच मनप्रीत कालरा यांनी माहिती दिली आहे.
गॅस्ट्रोएसोफेगल रिफ्लक्स आजार (GERD) म्हणजे काय?
गॅस्ट्रोएसोफेगल रिफ्लक्स आजार (GERD) ही पचनाशी संबंधित अशी समस्या आहे, ज्यामध्ये पोटातील ॲसिड वारंवार अन्ननलिकेत (एसोफॅगस) परत येते. यामुळे जेवणानंतर छातीत जळजळ होणे, तोंडात आंबट पाणी येणे, आंबट ढेकर येणे आणि घशात त्रास होणे अशा समस्या जाणवतात.
खरं तर, जेव्हा पोट आणि अन्ननलिका यांच्यातील व्हॉल्व्ह (Valve) व्यवस्थित बंद होत नाही, तेव्हा GERD ची समस्या निर्माण होते. यामुळे ॲसिड वरच्या बाजूला येऊ लागते. अशा वेळी तुमचा आहार खूप महत्त्वाचा ठरतो. काही पदार्थ हा व्हॉल्व्ह शिथिल करतात किंवा ॲसिडचे प्रमाण वाढवतात, ज्यामुळे रिफ्लक्सची समस्या अधिक गंभीर होते. तर दुसरीकडे, काही पदार्थ ॲसिड शांत करण्यास मदत करतात. म्हणूनच ज्यांना वारंवार ॲसिडिटी होते, त्यांनी योग्य आहाराची निवड करणे अत्यंत आवश्यक आहे.
ॲसिडिटी झाल्यावर काय खाऊ नये?
ज्यांना ॲसिडिटीचा त्रास असतो, त्यांनी खालील गोष्टी पूर्णपणे टाळल्या पाहिजेत किंवा अत्यंत मर्यादित प्रमाणात खाल्ल्या पाहिजेत:
- तिखट आणि मसालेदार अन्न: लाल तिखट, काळी मिरी, तिखट चटणी आणि हिरवी मिरची खाणे टाळा.
- तळलेले पदार्थ: समोसे, भजी, पुरी, कचोरी आणि फ्राईज खाणे टाळा.
- पेये: कॉफी, एनर्जी ड्रिंक्स, सायट्रस ज्यूस आणि अल्कोहोल यांसारखी ॲसिडिटी वाढवणारी व आंबवलेली पेये अजिबात पिऊ नका.
ॲसिडिटीवर काय खावे?
ॲसिड रिफ्लक्स कमी करायचा असेल, तर आहारात या गोष्टींचा नक्की समावेश करा:
- अल्कलाइन फळे: कमी ॲसिड असणारी फळे जसे की केळी, पपई, टरबूज आणि खरबूज खा.
- प्रॉटीनयुक्त पदार्थ: मूग डाळ, टोफू, पनीर आणि सोयाबीनचा आहारात समावेश करा.
- थंड व पाचक पेये: पाणी, शहाळ्याचे पाणी, बडीशेपचे पाणी आणि ताक ॲसिड शांत करण्यास मदत करतात.
