डोळ्यांच्या समस्यांकडे दुर्लक्ष करु नका असू शकतो ब्रेन ट्यूमर; ‘ही’ साधी लक्षणं ठरू शकतात जीवघेणी, लगेच जाणून घ्या

मेंदूच्या ट्यूमरची लक्षणे डोळ्यांच्या समस्यांच्या स्वरूपात दिसून येऊ शकतात. वस्तू दोन दिसणे (डबल व्हिजन) किंवा अंधूक दिसणे यांसारख्या समस्यांकडे अनेकदा केवळ डोळ्यांचे सामान्य विकार म्हणून पाहिले जाते; परंतु प्रत्यक्षात ही लक्षणे मेंदूच्या कार्यात बिघाड किंवा मेंदूतील ट्यूमरचे संकेत असू शकतात. डॉक्टरांच्या मते, अचानक दृष्टी जाणे, अंधूक दिसणे, वस्तू दोन दिसणे किंवा एका बाजूचे न दिसणे ही मेंदूतील ट्यूमरची लक्षणे असू शकतात. या समस्यांचा परिणाम डोळ्यांवर होत असला तरी त्या एखाद्या गंभीर मज्जासंस्थेविषयक आजाराचे (न्यूरोलॉजिकल कंडिशन) धोक्याचे संकेतही असू शकतात. या समस्या मेंदूतील गाठ (ब्रेन ट्यूमर), पक्षाघात (स्ट्रोक), कवटीच्या आतील वाढलेला दाब किंवा मज्जातंतूंचे नुकसान यांची लक्षणे असू शकतात.

डॉक्टरांच्या मते, चांगली दृष्टी मिळवण्यासाठी तुमचे डोळे आणि मेंदू एकत्रितपणे काम करतात. त्यामुळे डोळ्यांशी संबंधित काही लक्षणे मेंदूच्या दुखापतीचे किंवा हानीचे संकेत असू शकतात. या समस्यांचे वेळीच निदान आणि उपचार केल्यास मेंदू आणि डोळे या दोघांचेही रक्षण करण्यास मदत होऊ शकते, म्हणूनच जर तुम्हाला अशी लक्षणे आढळली तर तपासणीसाठी डॉक्टरांचा सल्ला घेण्यास विलंब करू नका.

मेंदूच्या गाठींशी (ब्रेन ट्यूमरशी) संबंधित इतर कोणती लक्षणे आहेत?

• सकाळी अधिक तीव्र होणारी डोकेदुखी
• मळमळ किंवा उलट्या
• दृष्टीशी संबंधित समस्या
• हात किंवा पायांच्या हालचालींवर मर्यादा येणे
• संतुलन राखण्यात अडचण येणे
• बोलण्यात अडचण येणे
• अतिशय थकवा जाणवणे
• गोंधळल्यासारखे वाटणे
• गोष्टी लक्षात ठेवण्यास अडचण येणे
• साध्या सूचनांचे पालन करण्यास असमर्थता
• व्यक्तिमत्त्व आणि वागणुकीत बदल होणे
• फेफरे (झटके) येणे
• ऐकण्यास अडचण येणे
• चक्कर येणे किंवा भोवताली सर्व काही फिरत असल्यासारखे वाटणे
• भूक वाढणे किंवा वजन वाढणे.