केंद्रीय गृहमंत्री अमित शाह यांनी २० किलो वजन कमी करून डायबिटीज कशी नियंत्रणात आणली? म्हणाले, “कोणतीही ॲलोपॅथिक औषधे…”

“मी मधुमेही होतो… पण नंतर आयुष्य बदललं!”

एका कार्यक्रमात बोलताना अमित शाह म्हणाले, “मी मधुमेही होतो; पण मे २०२० नंतर मी माझ्या दिनचर्येत मोठे बदल केले.” त्यांनी स्पष्ट केले की, योग्य झोप, पुरेसं पाणी, संतुलित आहार व नियमित व्यायाम या चार गोष्टींनी त्यांच्या आयुष्याची दिशा बदलून टाकली. त्यामुळे सध्या त्यांच्या या फिटनेस प्रवासाची देशभरात जोरदार चर्चा सुरू आहे.

“दवाखान्याशिवाय फिटनेस मिळवला!”

सर्वांत आश्चर्यकारक दावा करताना त्यांनी सांगितले, “आज मी तुमच्यासमोर कोणतीही अॅलोपॅथिक औषधे किंवा इन्सुलिन न घेता उभा आहे.” त्यांच्या या विधानाने उपस्थितांमध्ये एकच चर्चा सुरू झाली. दीर्घकाळ मधुमेह असतानाही त्यांनी औषधांवर अवलंबून न राहता, जीवनशैलीच्या मदतीने स्वतःला नियंत्रित केल्याचे त्यांनी सांगितले.

२० किलो वजन कमी… आणि शरीरात मोठा बदल

अमित शाह यांनी पुढे सांगितले की, या सातत्यपूर्ण बदलांमुळे त्यांचे २० किलोपेक्षा जास्त वजन कमी झाले. त्यांच्या मते, मोठे बदल अचानक होत नाहीत, तर रोजच्या छोट्या सवयीच आयुष्य बदलतात.

“दररोज २ तास व्यायाम आणि ६ तास झोप अत्यावश्यक”

तरुणांना संदेश देताना त्यांनी सांगितले की, शरीर आणि मन दोन्ही तंदुरुस्त ठेवणं गरजेचं आहे. त्यांनी स्पष्टपणे सांगितले की,

• दररोज किमान २ तास व्यायाम
• आणि किमान ६ तास झोप
• ही आरोग्यासाठी अत्यंत महत्त्वाची आहे.

शिस्त आणि संतुलनच खरी गुरुकिल्ली

त्यांच्या मते, मधुमेह नियंत्रणासाठी सर्वांत मोठा आधार म्हणजे शिस्तबद्ध जीवनशैली. तसेच घरगुती आणि संतुलित आहार, प्रक्रिया केलेल्या अन्नापासून दूर राहणे, साखरेचे प्रमाण कमी करणे आणि नियमित चालणे किंवा योग करणे या बाबी अत्यंत आवश्यक आहेत.

ते म्हणाले, “शॉर्टकटने आरोग्य मिळत नाही. सातत्याने केलेले छोटे बदलच मोठे परिणाम देतात.”

“लहान सुरुवात करा; पण थांबू नका!”

अमित शाह यांनी शेवटी अत्यंत महत्त्वाचा संदेश दिला. लहान बदल सुरू करा; पण ते थांबवू नका. कारण- याच सवयी हळूहळू शरीराला आतून मजबूत करतात आणि मधुमेहासारख्या आजारांवर नियंत्रण मिळविण्यास मदत करतात. त्यांच्या या अनुभवातून एकच गोष्ट स्पष्ट होते-
औषधांपेक्षा जीवनशैलीचा बदल हा खरा उपचार ठरू शकतो.