जेवल्यानंतर छातीत जळजळ, आंबट ढेकर? ‘हा’ फक्त गॅस किंवा अ‍ॅसिडिटी समजून दुर्लक्ष करू नका; यामागे असू शकतं गंभीर कारण

छातीत जळजळ नेमकी का होते?

आपल्या पोटात अन्न पचवण्यासाठी आम्ल तयार होते. पोट आणि अन्ननलिका यांच्यामध्ये एक स्नायूंचा झडपा असतो. हा झडपा व्यवस्थित बंद न झाल्यास पोटातील आम्ल अन्ननलिकेत वर येऊ शकते. अन्ननलिकेच्या आतील आवरणाला पोटातील आम्लापासून तितके संरक्षण नसल्यामुळे तिथे जळजळ किंवा अस्वस्थता जाणवते. यालाच अ‍ॅसिड रिफ्लक्स म्हणतात. यासोबत आंबट ढेकर येणे, तोंडात आंबट चव येणे, घशात जळजळ होणे किंवा छातीत आग होण्यासारखी भावना निर्माण होऊ शकते.

तिखट, तेलकट पदार्थ ठरू शकतात ट्रिगर

खाण्यापिण्याच्या काही सवयींमुळे हार्टबर्नची समस्या वाढू शकते. खूप तळलेले, मसालेदार किंवा जास्त चरबीयुक्त पदार्थ काही लोकांमध्ये छातीत जळजळ वाढवू शकतात. तसेच एकावेळी खूप जास्त जेवण केल्याने पोटावर दबाव वाढू शकतो. काही लोकांमध्ये चहा-कॉफी, चॉकलेट किंवा कार्बोनेटेड ड्रिंक्स घेतल्यानंतरही ही समस्या जाणवू शकते. मात्र, प्रत्येक व्यक्तीमध्ये ट्रिगर वेगळे असू शकतात.

जेवल्यानंतर लगेच झोपण्याची चूक करू नका

जेवण झाल्यानंतर लगेच आडवे झाल्यास पोटातील आम्ल वर येण्याची शक्यता वाढू शकते. रात्री उशिरा भरपेट किंवा जड जेवण केल्यानंतर ही समस्या अधिक जाणवू शकते. त्यामुळे जेवण आणि झोप यामध्ये पुरेसे अंतर ठेवणे फायदेशीर ठरू शकते. जेवल्यानंतर लगेच झोपण्याऐवजी काही वेळ हलकी हालचाल करणे हा तुलनेने चांगला पर्याय आहे.

छातीत जळजळ म्हणजे अ‍ॅसिडिटीच असे नाही

छातीत होणारी प्रत्येक जळजळ ही गॅस किंवा अ‍ॅसिडिटीमुळेच होते असे समजणे योग्य नाही. काही वेळा छातीशी संबंधित गंभीर समस्या देखील अशाच स्वरूपात जाणवू शकतात. छातीत जळजळ किंवा अस्वस्थतेसोबत तीव्र दबाव किंवा वेदना, श्वास घेण्यास त्रास, थंड घाम, चक्कर, मळमळ किंवा उलटी अशी लक्षणे दिसत असतील, तर त्याकडे दुर्लक्ष करू नका आणि तातडीने वैद्यकीय मदत घ्या. वारंवार हार्टबर्न होत असेल, औषधांशिवाय आराम मिळत नसेल किंवा लक्षणे वाढत असतील, तर डॉक्टरांचा सल्ला घेणे योग्य ठरेल.