Mouth cancer early symptoms : कर्करोग हा एक गंभीर आजार आहे, ज्यामुळे दरवर्षी मोठ्या संख्येने लोकांचा मृत्यू होतो. आज जगात कर्करोगाचे १०० हून अधिक प्रकार आहेत, जे लोकांना प्रभावित करून त्यांचे आयुष्य उद्ध्वस्त करतात. प्रसारमाध्यमांच्या वृत्तानुसार, या आजारावर अद्याप कोणताही निश्चित इलाज उपलब्ध नाही, ज्यामुळे तो आणखी धोकादायक बनतो. तुम्ही फुप्फुस आणि किडनीच्या कर्करोगाबद्दल ऐकले असेल; पण या लेखात आम्ही तुम्हाला तोंडाच्या कर्करोगाबद्दल सांगणार आहोत, ज्याची लक्षणेदेखील धोकादायक आहेत. चला तर मग जाणून घेऊया की हा कर्करोग नेमका काय आहे आणि तो शरीरात आपली मुळे कशी घट्ट करतो.
तोंडाचा कर्करोग म्हणजे काय?
जागतिक आरोग्य संघटनेनुसार, तोंडाचा कर्करोग म्हणजे तोंडाच्या कोणत्याही भागात होणारा कर्करोग, ज्यामध्ये जीभ, ओठ, हिरड्या, गालांच्या आतील त्वचा, टाळू किंवा तोंडाचे इतर भाग यांचा समावेश होतो. याची सुरुवात अनेकदा अशा लक्षणांनी होते, ज्याकडे लोक सामान्य समजून दुर्लक्ष करतात. तथापि, कर्करोगाला वाढण्यासाठी, त्याची मुळे घट्ट करण्यासाठी आणि एखाद्या व्यक्तीला त्याचा बळी बनवण्यासाठी अशाच प्रकारच्या दुर्लक्षाची आवश्यकता असते.
आयसीएमआरच्या अहवालात म्हटले आहे की, यामागे एक-दोन नव्हे, तर अनेक कारणे आहेत, ज्यामध्ये खालील गोष्टींचा समावेश आहे…
- तंबाखू, सिगारेट, बिडी, पाईप, सिगार इत्यादींच्या सेवनाने तोंडाचा कर्करोग होऊ शकतो.
- तोंडात तंबाखूची पुडी किंवा गुटखा ठेवल्याने गाला, हिरड्या आणि तोंडाच्या आतील भागाचा कर्करोग होऊ शकतो.
- विड्याची पाने आणि सुपारीमुळेदेखील तोंडाचा कर्करोग होऊ शकतो.
- मद्यपानामुळे तोंडाच्या कर्करोगाचा धोका वाढतो आणि जे लोक दररोज तीन ते चार पेग पितात, त्यांना मद्यपान न करणाऱ्यांच्या तुलनेत जवळपास दुप्पट धोका असतो.
- जे लोक दारू आणि तंबाखू दोन्हीचे सेवन करतात त्यांना तोंडाचा कर्करोग होण्याचा धोका आणखी जास्त असतो.
- योग्य पोषणाचा अभाव आणि फळे व भाज्यांचे कमी सेवन यामुळे तोंड आणि घशाच्या (ओरोफॅरिंक्स) कर्करोगाचा धोका वाढू शकतो. ज्यांची प्रतिकारशक्ती कमकुवत असते त्यांना तोंडाचा कर्करोग होण्याचा धोका जास्त असतो.
- हा आजार टाळण्यासाठी, वर नमूद केलेल्या सवयींपैकी कोणतीही सवय ताबडतोब सोडून देणे महत्त्वाचे आहे. तसेच, आपल्या डॉक्टरांचा नियमित सल्ला घ्या.
तोंडाच्या कर्करोगाची लक्षणे कोणती?
- तोंड, चेहरा किंवा मानेवर असलेली न बरी होणारी जखम.
- तोंड उघडण्यास अडचण.
- जिभेवर, हिरड्यांवर किंवा तोंडाच्या आत पांढरे, लाल किंवा मिश्र रंगांचे चट्टे.
- मानेतील गाठ किंवा कोणत्याही प्रकारची कठीण गाठ.
- तोंड, जीभ किंवा जबड्यात सतत होणारी वेदना.
- चघळण्यास किंवा गिळण्यास अडचण येणे.
- ओठ, हिरड्या किंवा तोंडाच्या आत सूज, जाडसरपणा, गाठी किंवा उंचवटे असणे.
- कोणत्याही कारणाशिवाय तोंडातून रक्तस्राव होणे
- घोगरा आवाज किंवा आवाजात बदल
- अचानक वजन कमी होणे.
