हृदय, हाडे आणि पचनासाठी अळूची पाने ठरतात वरदान! चव आणि आरोग्याचा दुहेरी फायदा

अळूची पाने खाण्याचे फायदे काय?

• अळूची पाने खाल्ल्याने तुमची रोगप्रतिकार शक्ती मजबूत होते. त्यामध्ये अ जीवनसत्त्व असते, जे मोतीबिंदू, निकट दृष्टी व अंधत्व यांसारख्या डोळ्यांच्या समस्यांना प्रतिबंध करण्यासाठीदेखील प्रभावी आहे.
• हे घटक चरबी आणि ग्लिसरॉल, विशेषतः ट्रायग्लिसराइड्सचे विघटन करून कोलेस्ट्रॉलची पातळी कमी करण्यात महत्त्वाची भूमिका बजावू शकतात.
• वजन कमी करण्यासाठी तुम्ही अळूची पानेदेखील खाऊ शकता. तुमचे फिटनेस ध्येय साध्य करण्यात त्यांची महत्त्वाची भूमिका असते. पोटावरील चरबी कमी करण्यासाठी तुम्ही त्यांचा वापर करू शकता.
• अळूची पाने ओमेगा-३ फॅटी ॲसिडसह आवश्यक फॅटी ॲसिडचा एक समृद्ध स्रोत आहेत. ही पाने तुमचा रक्तदाब नियंत्रित ठेवण्यासही मदत करतात.
• अळूच्या पानांमध्ये लोह खनिज मुबलक प्रमाणात असते, जे लाल रक्तपेशींच्या निर्मितीमध्ये महत्त्वाची भूमिका बजावते.

अळूच्या पानांपासून हे पदार्थ बनवू शकता

अळूची पाने नेहमी चांगली शिजवूनच खावीत. कारण- कच्च्या पानांमध्ये असलेले काही नैसर्गिक घटक घशात खवखव किंवा जळजळ निर्माण करू शकतात. अळूच्या पानांपासून अनेक चविष्ट आणि पौष्टिक पदार्थ बनवले जातात. त्यापैकी काही लोकप्रिय पदार्थ :

• अळूवडी (पात्रा) – बेसन आणि मसाले लावून वाफवलेल्या अळूच्या पानांच्या वड्या.
• अळूची भाजी – चिरलेली पाने डाळ, शेंगदाणे किंवा हरभरा डाळ घालून बनवलेली भाजी.
• अळूचे फदफदे – कोकणातील पारंपरिक आंबट-गोड चवीचा पदार्थ.
• अळूच्या पानांचे पकोडे/भजी – बेसनाच्या पिठात बुडवून तळलेले.
• अळूची पातळ भाजी (रस्सा) – चिंच, गूळ आणि मसाल्यांसह बनवली जाते.
• अळू पराठा – बारीक चिरलेली पाने कणकेत मिसळून बनवलेला पराठा.
• अळूचे थालीपीठ – अळूची पाने आणि विविध पिठे वापरून.
• अळूची डाळभाजी – तूरडाळ किंवा चणा डाळ घालून बनवलेली पौष्टिक भाजी.

अळूची पाने वापरताना चिंच, कोकम, ताक किंवा लिंबू यांसारखे आंबट पदार्थ घातल्यास त्यातील खाज निर्माण करणारे घटक कमी होण्यास मदत होते.