Walnuts For Gut Health : वाढत्या धावपळीच्या आयुष्यात आरोग्याची काळजी घेणे कठीण होते. पण तुम्हाला माहिती आहे का, आहारात केलेला एक छोटासा बदल तुम्हाला गंभीर आजारांपासून दूर ठेवू शकतो? सुक्या मेव्यांमध्ये अक्रोडला पोषक तत्वांचा खरा ‘पावरहाऊस’ मानले जाते. दररोज योग्य पद्धतीने ३ ते ४ अक्रोड खाण्यास सुरुवात केल्यास ते तुमच्या हृदय, मेंदू आणि पोटाच्या आरोग्याचा (Gut Health) कायापालट करू शकते.
नुकतेच मुंबईतील प्रसिद्ध न्यूट्रिशनिस्ट दीपशिखा जैन यांनी त्यांच्या इन्स्टाग्राम हँडलवर एक व्हिडिओ शेअर करत अक्रोडचे फायदे सांगितले आहेत. त्यांच्या मते, अक्रोड शरीराची अंतर्गत सूज कमी करून स्मरणशक्ती आणि हृदय सुदृढ ठेवण्यास मदत करतो.
अक्रोडचे आरोग्यदायी फायदे:
१. जुनाट सूज (Inflammation) पासून आराम:
शरीरात दीर्घकाळ राहणारी सूज ही अनेक गंभीर आजारांचे मूळ मानली जाते. अक्रोड ही सूज कमी करण्यासाठी अत्यंत प्रभावी ठरतो. यामध्ये ‘इलेगिटॅनिन’ (Ellagitannins) नावाचे शक्तिशाली अँटी-इन्फ्लमेटरी कंपाउंड आणि अँटी-ऑक्सिडंट्स असतात, जे शरीराच्या अंतर्गत अवयवांची सूज वेगाने कमी करण्यास मदत करतात.
२. पचनतंत्र आणि आतड्यांच्या आरोग्यात (Gut Health) सुधारणा:
पोट आणि पचनसंस्थेसाठी अक्रोड फायदेशीर ठरते. अक्रोडच्या सालीमध्ये मुबलक प्रमाणात फायबर आणि पॉलिफेनॉल्स असतात. हे घटक आतड्यांमधील ‘गुड बॅक्टेरिया’ (Good Bacteria) वाढवण्यास मदत करतात. आतड्यांचे आरोग्य (Gut Microbiome) चांगले राहिल्यामुळे शरीराची प्रतिकारशक्ती आणि पचनक्षमता मजबूत होते.
३. तल्लख मेंदू आणि उत्कृष्ट स्मरणशक्तीसाठी:
अक्रोडचा आकार हुबेहूब मानवी मेंदूप्रमाणे असतो आणि तो मेंदूसाठी सर्वोत्तम सुपरफूड मानला जातो. ओमेगा-३ फॅटी ॲसिड आणि उच्च दर्जाच्या अँटी-ऑक्सिडंट्सने समृद्ध असल्यामुळे अक्रोड मेंदूच्या कार्यक्षमतेला (Cognitive Function) गती देतो.
तणावामुळे अनेकदा लोकांची एकाग्रता कमी होते, अशा वेळी नियमित अक्रोड खाल्ल्याने एकाग्रता आणि विचार करण्याची क्षमता सुधारते. याशिवाय, वाढत्या वयासह होणाऱ्या विसरभोळेपणाच्या समस्येपासून म्हणजेच अल्झायमर (Alzheimer’s) आणि डिमेंशिया (Dementia) सारख्या गंभीर आजारांचा धोका बऱ्याच प्रमाणात कमी होतो.
४. मजबूत हृदय आणि बॅड कोलेस्ट्रॉलवर नियंत्रण:
हृदय निरोगी ठेवण्यासाठी अक्रोड नैसर्गिक औषधासारखे कार्य करतो. शरीरातील लिपिड प्रोफाइल सुधारण्यासाठी अक्रोड ओळखला जातो. चुकीच्या आहारामुळे रक्तवाहिन्यांमध्ये जमा होणारे वाईट कोलेस्ट्रॉल (LDL) हार्ट ब्लॉकचे मुख्य कारण ठरते.
अक्रोड हे हानिकारक कोलेस्ट्रॉल कमी करण्यात महत्त्वाची भूमिका बजावतो. तसेच, नियमित सेवनाने रक्तवाहिन्यांची लवचिकता टिकून राहते आणि रक्तदाब (Blood Pressure) नियंत्रणात राहतो. कोलेस्ट्रॉल आणि ब्लड प्रेशर नियंत्रित राहिल्याने साहाजिकच हार्ट अटॅकचा (Heart Attack) धोका कमी होतो.
अक्रोड खाण्याची सर्वात योग्य आणि सुरक्षित पद्धत:
कोणत्याही सुपरफूडचा पूर्ण फायदा तेव्हाच मिळतो जेव्हा ते खाण्याची योग्य पद्धत माहित असते. अक्रोडमधील सर्व जीवनसत्त्वे आणि पोषक तत्वे शरीरात व्यवस्थित शोषली जावीत यासाठी पोषणतज्ज्ञ ते भिजवून खाण्याचा सल्ला देतात.
अक्रोड नेहमी रात्रभर पाण्यात भिजत ठेवावेत आणि दुसऱ्या दिवशी सकाळी रिकाम्या पोटी ३ ते ४ भिजवलेले अक्रोड खावेत. पाण्यात भिजवल्यामुळे त्याची उष्णता सामान्य होते आणि ते पचायला हलके होतात. यामुळे शरीरात उष्णता वाढत नाही, पचनाचा त्रास होत नाही आणि शरीराला १००% फायदे मिळतात.
