कपाटात डेनिमची जीन्स नाही, अशी व्यक्ती आपल्याला फार क्वचितच आढळेल. डेनिमचे जीन्स, शर्ट, टॉप, वनपीस, स्कर्ट, कुर्ती आणि आणखी बरेच पर्याय आपल्यासाठी बाजारात उपलब्ध आहेत. लहान मुलांपासून ते अगदी मोठ्यांपर्यंत सर्वांना परिधान करता येतील, असे सर्व प्रकारचे कपडे डेनिमच्या कापडापासून बनवतात. हे कापड कंफर्टेबल आणि टिकाऊ असतं. पण ते कापड कसं तयार करतात हे तुम्हाला माहितीये का? आज आपण डेनिम जीन्सचे कापड तयार कसे केले जाते आणि त्यापासून इतर कपडे कसे तयार होतात, ते जाणून घेणार आहोत. कापूस ते कापडापर्यंतचा प्रवास कोणतेही कापड तयार करायचे असेल तर त्यासाठी सर्वात महत्वाची वस्तू असते ती म्हणजे कापूस. त्याचप्रमाणे डेनिम तयार करण्यासाठीही कापूस लागतो. हा कापूस कापड होण्यापर्यंत अनेक टप्प्यांमधून जातो. कापूस काढला की नंतर कापूस आणि बिया वेगळ्या करणे, त्याला प्रोसेस करून त्याचे सूत तयार करणे, सूत रंगवणे आणि शेवटी कापड कमी होऊ नये म्हणून यार्नची प्रक्रिया (सॅनफोरायझेशन) करणे. ही प्रक्रिया झाल्यानंतर डेनिम बनवण्यासाठी धागे तयार केले जातात. या डेनिम धाग्यांमध्ये स्पॅन्डेक्स किंवा इलास्टेन हे सिंथेटिक फायबर समाविष्ट केले जातात. हे सिंथेटिक फायबर कापडाच्या स्ट्रेचिंगसाठी वापरलं जातं. याची स्ट्रेचिंग क्षमता ३% टक्क्यांवरून १५% पर्यंत वाढू शकते. डेनिमच्या कपड्याला रंग कसा दिला जातो? इंडिगो डाईंग ही रंगाची पारंपारिक पद्धत आहे, यात मुख्यतः निळ्या रंगाची छटा मिळते. इंडिगो डाई इंडिगोफेरा कुटुंबात समाविष्ट असलेल्या वनस्पतींपासून बनवले जाते. दक्षिण पूर्व आशियामध्ये, हा रंग इंडिगोफेरा टिंक्टोरियाच्या वाळलेल्या आणि आंबलेल्या पानांपासून बनविला जातो आणि ही पद्धत जागतिक स्तरावर सामान्य झाली आहे. इंडिगो पद्धत सध्या जवळजवळ सर्व उत्पादकांची सर्वाधिक पसंतीची पद्धत आहे. जरी मूळतः हा रंग नैसर्गिक स्त्रोतांपासून बनविला गेला असला तरी, सध्या बहुतेक डेनिम सिंथेटिक इंडिगो डाईने रंगवले जातात.सल्फर डाईंगला कलर डाईंग असेही म्हणतात आणि विशिष्ट रंगीत डेनिम जसे की काळा, पांढरा, गुलाबी आणि इतर काही रंग तयार करण्यासाठी हा सल्फर डाईंग वापरला जातो. रंग दिल्यानंतर दोऱ्याने विणकाम करून त्याचे कापड तयार केले जाते. तांत्रिक भाषेत, विणकाम हे दोऱ्यांचे दोन संच एका निश्चित ९०° कोनात जोडण्याची प्रक्रिया आहे. दोऱ्याचे दोन संच वापरून वॉर्प आणि वेफ्ट पद्धतीने विणकाम करून हे कापड तयार केले जाते. मागणीनुसार बनतं कापड हे कापड कपड्यांच्या ब्रँड्सच्या मागणीनुसार तयार केलं जातं. स्ट्रेचिंग, कलर कॉम्बिनेशन, कापड किती जाड असावं, यासंदर्भात कपड्यांच्या ब्रँड्सची जशी मागणी असते, त्यानुसार कापड तयार केलं जातं. पुढे याच कपड्यांमधून जीन्स, स्कर्ट, कुर्ता, जॅकेट आणि असे अनेक डेनिम प्रोडक्ट्स तयार होतात, असं विशाल फॅब्रिक्सचे विनय थडानी सांगतात. डेनिम कनेक्शन बनवण्याचा मार्ग "खरं तर डेनिम फक्त तरुणांसाठी, पार्ट्यांसाठी किंवा रोड ट्रिपसाठी आहे, असं म्हटलं जातं. परंतु आम्ही त्याच्याशी सहमत नाही. कारण आम्ही डेनिमला नाईटवेअर, स्पोर्ट्सवेअर, लेजरवेअर, पारंपारिक पोशाख यासारखे अनेक प्रकार म्हणून पाहतो. आमच्यासाठी, डेनिम हा सर्व अडथळे तोडून लोकांमध्ये वय, लिंग किंवा स्थान लक्षात न घेता कनेक्शन बनवण्याचा एक मार्ग आहे," अशा शब्दांत विशाल फॅब्रिक्सचे विनय थडानी डेनिमविषयीचा आपला दृष्टीकोन स्पष्ट करतात.