डायबिटीस असेल तर दूध प्यावं का? गंभीर परिणाम होण्याआधी तज्ञांकडून जाणून घ्या

आयुर्वेदिक आणि युनानी औषधशास्त्रातील तज्ज्ञ डॉ. सलीम झैदी यांच्या मते, मधुमेह असल्यास दूध पिणे पूर्णपणे थांबवण्याची गरज नाही; फक्त योग्य दूध निवडणे महत्त्वाचे आहे. दुधामध्ये नैसर्गिकरीत्या लॅक्टोज नावाची साखर असते, जी शरीरात पचन झाल्यावर ग्लुकोज आणि गॅलॅक्टोजमध्ये रूपांतरित होते. त्यामुळे दूध पिण्याचा रक्तातील साखरेवर काही परिणाम होऊ शकतो; परंतु ते टाळण्याची गरज नाही. मधुमेही दूध पिऊ शकतात. चला, एका तज्ज्ञाकडून जाणून घेऊया की, दूध पिण्याचा मधुमेहींच्या आरोग्यावर कसा परिणाम होऊ शकतो आणि मधुमेही कोणते दूध पिऊ शकतात.

दूध प्यायल्याने शरीरावर काय परिणाम होतो?

दुधामध्ये नैसर्गिकरीत्या लॅक्टोज नावाची साखर असते, जी पचनादरम्यान ग्लुकोज आणि गॅलॅक्टोजमध्ये रूपांतरित होते. हे घटक शरीराला ऊर्जा पुरवतात; परंतु मधुमेही व्यक्तींमध्ये रक्तातील साखर वाढवू शकतात. तथापि, केवळ लॅक्टोजच्या उपस्थितीमुळे मधुमेहींनी दूध पूर्णपणे टाळणे आवश्यक नाही. मधुमेही दूध पिऊ शकतात. दुधातील प्रथिने आणि चरबीदेखील त्याच्या पचन आणि रक्तातील साखरेवर परिणाम करतात, त्यामुळे दुधाचे परिणाम व्यक्तीनुसार आणि सेवन केलेल्या प्रमाणावर अवलंबून बदलू शकतात.

मधुमेहामध्ये किती दूध प्यावे?

मधुमेही व्यक्तीने आपला एकूण आहार आणि रक्तातील साखरेची पातळी यांनुसार दुधाचे सेवन समायोजित केले पाहिजे. मधुमेही दररोज अंदाजे २०० मिली दूध पिऊ शकतात. तथापि, हे प्रमाण प्रत्येकासाठी निश्चित मानले जाऊ नये. दूध प्यायल्यानंतर रक्तातील साखर वाढल्यास, दुधाच्या प्रमाणाबाबत डॉक्टर किंवा आहारतज्ज्ञांचा सल्ला घेणे उत्तम.

टोण्ड दूध की फुल-क्रीम दूध: मधुमेहासाठी कोणते दूध?

टोण्ड आणि फुल-क्रीम दुधामधील मुख्य फरक हा त्यामधील फॅटच्या प्रमाणाचा असतो. टोण्ड दुधात फॅट कमी असते; तर फुल-क्रीम दुधात फॅट जास्त असते. मधुमेहींसाठी फुल-क्रीम दूध हा चांगला पर्याय मानला जात नाही. जर एखाद्या व्यक्तीला मधुमेह, उच्च कोलेस्ट्रॉल, उच्च ट्रायग्लिसराइड्स किंवा हृदयाशी संबंधित धोक्याचे घटक असतील, तर कमी फॅट असलेले दूध अधिक योग्य ठरू शकते. त्यामुळे दुधाची निवड केवळ रक्तातील साखरेवर आधारित नसावी, तर ती संपूर्ण आरोग्य आणि आहारावर आधारित असावी.

गाईचे दूध की म्हशीचे दूध; तुम्ही कोणते दूध निवडाल?

गाय आणि म्हशीच्या दुधाची पौष्टिक रचना वेगवेगळी असते. म्हशीच्या दुधात सामान्यतः चरबीचे प्रमाण जास्त असते; तर गाईच्या दुधात चरबीचे प्रमाण कमी असते. त्यामुळे जर एखाद्या व्यक्तीला उष्मांक आणि संतृप्त चरबी मर्यादित ठेवायची असेल, तर कमी चरबीचा पर्याय उपयुक्त ठरू शकतो.

मधुमेही रुग्णांनी दुधाचे सेवन कसे करावे?

ज्या मधुमेहींना दूध प्यायचे आहे, ते त्यासोबत बदाम, चिया सीड्स किंवा इतर प्रथिनयुक्त पदार्थ घेऊ शकतात. या पदार्थांमध्ये प्रथिने, चरबी आणि फायबर असतात, जे जेवणानंतर रक्तातील साखर खूप वेगाने वाढण्यापासून रोखण्यास मदत करतात.

मधुमेहामध्ये दूध पिताना कोणत्या गोष्टी लक्षात ठेवाव्यात?

मधुमेहाच्या आहारात दुधाचा समावेश करताना, त्याचे प्रमाण, प्रकार आणि एकूण दैनंदिन कर्बोदकांचे प्रमाण विचारात घेणे महत्त्वाचे आहे. दुधात साखर, स्वादयुक्त पावडर किंवा गोड सिरप घालणे टाळा.

मधुमेहाचे रुग्ण मधुमेहावर नियंत्रण कसे मिळवू शकतात?

• रक्तातील साखर नियंत्रणात ठेवण्यासाठी मधुमेही रुग्णांनी वेळेवर औषधे घ्यावीत आणि दररोज साखर तपासावी.
• तुमच्या साखरेची पातळी वाढल्यास, ताबडतोब डॉक्टरांचा सल्ला घ्या.
• गोड पदार्थ खाणे टाळा आणि मीठ कमी खा.
• संतुलित आहार घ्या, ज्यामध्ये ५०-६०% जटिल शर्करा, २०-३०% चरबी आणि ३०-४०% प्रथिने यांचा समावेश असावा.
• तुमच्या आहारात बटाटे आणि रिफाइंड पिठाचे पदार्थ टाळा. मद्यपान टाळा.
• मधुमेह नियंत्रणात ठेवण्यासाठी, आपले शरीर सक्रिय ठेवा. योग, चालणे व व्यायाम या गोष्टी शरीर सक्रिय ठेवण्यास आणि तणाव कमी करण्यास मदत करतात.