उन्हाळ्यात एकदा तरी आवर्जून जांभूळ खा! जबरदस्त फायदे वाचून व्हाल चकित

काळी, रसरशीत जांभळे केवळ चविष्टच नाहीत, तर आरोग्यदायीदेखील आहेत. त्यामध्ये अँटीऑक्सिडंट्स, फ्लेवोनॉइड्स, व्हिटॅमिन सी, झिंक व कॅल्शियम यांसारखे अनेक गुणधर्म आढळतात. त्यामध्ये मधुमेहविरोधी गुणधर्म आहेत, जे मधुमेही रुग्णांसाठी खूप फायदेशीर मानले जातात. परंतु, फायद्यांबरोबरच ते खाण्याचे काही तोटेही आहेत. चला तर मग, जांभूळ खाण्याचे फायदे आणि तोटे जाणून घेऊया.

आपल्या आहारात जांभळांचा समावेश कसा करावा?

तुमच्या आहारात जांभळांचा अनेक प्रकारे समावेश करता येतो. सॅलडमध्ये काळ्या मिठाबरोबर खाणे हा सर्वोत्तम मार्ग आहे. तुम्ही त्याचा रस पिऊ शकता, लोणचे बनवू शकता आणि मुरांबा म्हणूनही खाऊ शकता

साहित्य:

• जांभूळ
• साखर
• पाणी
• लिंबाचा रस
• वेलची पावडर

पद्धत:

सर्वप्रथम जांभळे धुऊन स्वच्छ करा आणि त्यांच्या बिया काढून टाका. एका पातेल्यात पाणी आणि साखर गरम करून, साखर पूर्णपणे विरघळू द्या. बिया काढलेली जांभळे साखरेच्या पाकात टाका आणि मध्यम आचेवर शिजवा. जांभळे मऊ होऊन, पाक घट्ट होईपर्यंत शिजवा. लिंबाचा रस आणि वेलची पूड घालून मिसळा. जांभळाचा मुरांबा तयार आहे. तो थंड झाल्यावर हवाबंद बरणीत साठवून ठेवा.

जांभूळ खाण्याचे फायदे

फायबर आणि अँटिऑक्सिडंट्स

ब्ल्यूबेरीच्या तुलनेत जांभूळ या फळामध्ये जास्त फायबर असते, ज्यामुळे मधुमेहींसाठी जांभळाचे सेवन हा उत्तम पर्याय ठरतो. त्यामुळे तुम्हाला जास्त वेळ पोट भरले असल्याची जाणीव होते. तसेच यामुळे रक्तप्रवाहात साखरेचे उत्सर्जन कमी होते. पोषणाचे आतड्यांमध्ये शोषण व्हावे यासाठीसुद्धा हे फळ कामी येते. जांभळांमध्ये अँथोसायनिन्स, इलाजिक ॲसिड आणि फ्लेवोनॉइड्ससह विविध बायोअॅक्टिव्ह संयुगे असतात, ज्यात अँटिऑक्सिडंट आणि दाहकविरोधी गुणधर्म असतात. ही संयुगे इन्सुलिनची संवेदनशीलता सुधारण्यास, रक्तातील ग्लुकोजची पातळी कमी करण्यास आणि स्वादुपिंडाच्या बीटा पेशींचे संरक्षण करण्यास मदत करतात, जे इन्सुलिन उत्पादनासाठी जबाबदार असतात.

जीवनसत्त्वे आणि खनिजे

जांभूळ या फळामध्ये क जीवनसत्त्व, लोह व पोटॅशियम हे घटक भरपूर प्रमाणात असतात. लोह हा घटक हिमोग्लोबिनची पातळी सुधारतो आणि रक्त नैसर्गिकरीत्या शुद्ध करतो. पोटॅशियम रक्तदाब नियंत्रित करतो. ब्ल्यूबेरी हे व्हिटॅमिन के, मँगनीज यांचे समृद्ध स्रोत आहेत; परंतु त्यामध्ये क जीवनसत्त्व कमी प्रमाणात आहे. जांभळात असणारी संयुगे कोलेस्ट्रॉल जमा होण्याचे प्रमाण कमी करते.

जांभळे खाण्याचे तोटे

काही लोकांसाठी जांभळे खाणे हानिकारक ठरू शकते. मूतखड्याच्या रुग्णांनी त्यात जास्त प्रमाणात ऑक्झलेट असल्यामुळे जांभळे खाणे टाळावे. तसेच, ज्यांना पचनाच्या समस्या आहेत त्यांनीही जांभळे खाणे टाळावे.