पहिल्या शारीरिक संबंधांनंतर रक्त आलं नाही तर? डॉक्टरांनी स्पष्ट सांगितलं, "प्रत्येक महिलेला पहिल्यांदा..."

Bleeding After First Sex: पहिल्यांदा शारीरिक संबंध प्रस्थापित केल्यानंतर रक्तस्राव होणं खरंच गरजेचं आहे का? याबाबत डॉक्टर काय सांगतात, ते जाणून घ्या.

Gynecologist explaining bleeding after first sexual intercourse and common myths about hymen and virginity

पहिल्या संबंधांनंतर रक्तस्रावाबाबत सत्य (Photo-AI Generated)

First Time Sex Bleeding: पहिल्यांदा शारीरिक संबंध प्रस्थापित केल्यानंतर रक्तस्राव होणे किंवा न होणे याबाबत समाजात आजही अनेक गैरसमज आहेत. विशेषतः पहिल्यांदा लैंगिक संबंधांनंतर रक्तस्राव झाला तरच महिला कुमारी होती असा समज अनेक ठिकाणी केला जातो. मात्र, रक्तस्राव झाला नाही म्हणून महिलेच्या कौमार्याबाबत निष्कर्ष काढणे योग्य आहे का? याचे उत्तर नाही, असे स्त्रीरोगतज्ज्ञ डॉ. वैदेही मराठे सांगतात.

महिलांच्या शरीराची रचना आणि शारीरिक वैशिष्ट्ये प्रत्येक व्यक्तीनुसार वेगळी असतात, त्यामुळे पहिल्यांदा शारीरिक संबंधांनंतर रक्तस्राव होणे आवश्यक नसते. काही महिलांना रक्तस्राव होतो तर काहींना अजिबात होत नाही, त्यामुळे केवळ रक्तस्राव झाला किंवा नाही यावरून महिलेच्या कौमार्याबाबत कोणताही निष्कर्ष काढता येत नाही.

पहिल्या शारीरिक संबंधांनंतर रक्तस्राव होणे आवश्यक आहे का?

डॉ. वैदेही मराठे यांच्या म्हणण्यानुसार, पहिल्यांदा शारीरिक संबंध प्रस्थापित केल्यानंतर प्रत्येक महिलेला रक्तस्राव होतोच असे नाही. योनीच्या प्रवेशद्वाराजवळ असलेल्या पातळ पडद्याला वैद्यकीय भाषेत हायमेन म्हटले जाते. या पडद्याची रचना आणि लवचिकता प्रत्येक महिलेमध्ये वेगवेगळी असू शकते.

काही महिलांमध्ये हा पडदा अधिक लवचिक असल्यामुळे शारीरिक संबंधांच्या वेळी त्याला इजा होऊन रक्तस्राव होईलच असे नाही, त्यामुळे पहिल्या संबंधांनंतर रक्तस्राव न होणे ही अनेक वेळा सामान्य बाब असू शकते.

मग काही महिलांना रक्तस्राव का होतो?

यामागेही वेगवेगळी कारणे असू शकतात. डॉ. मराठे यांच्या माहितीनुसार, शारीरिक संबंधांच्या वेळी पुरेसे नैसर्गिक वंगण नसल्यास घर्षण वाढू शकते, त्यामुळे योनीच्या भागात किरकोळ इजा होऊन हलका रक्तस्राव होण्याची शक्यता असते.

तसेच योनीमध्ये संसर्ग किंवा सूज असल्यासही संबंधांनंतर रक्तस्राव होऊ शकतो. अशा वेळी खाज, जळजळ किंवा वेदना यांसारखी लक्षणेही जाणवू शकतात.

गर्भाशयाच्या मुखाशी संबंधित काही समस्या असल्यासही शारीरिक संबंधांनंतर हलका रक्तस्राव होऊ शकतो. याशिवाय मासिक पाळी सुरू होण्याच्या आसपास किंवा पाळी नुकतीच संपल्यानंतर शारीरिक संबंध आल्यासही हलका रक्तस्राव होण्याची शक्यता असते.

शारीरिक हालचालींमुळेही होऊ शकतो बदल

डॉ. वैदेही मराठे यांच्या म्हणण्यानुसार, हायमेनची रचना प्रत्येक महिलेमध्ये सारखी नसते. काही वेळा सायकल चालवणे, धावणे, व्यायाम किंवा इतर शारीरिक हालचालींमुळे त्यात आधीच ताण निर्माण झालेला असू शकतो, त्यामुळे पहिल्या शारीरिक संबंधांनंतर रक्तस्राव होईलच असे नाही.

याचा अर्थ असा की रक्तस्राव झाला किंवा झाला नाही, या एकाच गोष्टीवरून महिलेच्या लैंगिक इतिहासाबाबत निष्कर्ष काढणे योग्य नाही.

हेही वाचा

युरिक ॲसिड झपाट्याने वाढवतात ‘या’ ५ डाळी; मुतखडा, गुडघेदुखी आणि संधिवाताचा त्रास होण्याआधीच व्हा सावध!

कोणत्या वेळी डॉक्टरांचा सल्ला घ्यावा?

शारीरिक संबंधांनंतर अगदी थोड्या प्रमाणात रक्ताचे डाग येणे आणि मोठ्या प्रमाणात रक्तस्राव होणे यात फरक आहे. मोठ्या प्रमाणात रक्तस्राव होत असल्यास डॉक्टरांचा सल्ला घेणे आवश्यक आहे.

संबंधांनंतर प्रत्येक वेळी रक्तस्राव होत असेल किंवा रक्तस्रावासोबत तीव्र वेदना, जळजळ अथवा अस्वस्थता जाणवत असेल तर त्याकडे दुर्लक्ष करू नये. ताप, दुर्गंधीयुक्त स्राव किंवा खाज यांसारखी लक्षणे दिसत असल्यासही स्त्रीरोगतज्ज्ञांचा सल्ला घेणे योग्य ठरते.

रक्तस्राव झाला नाही म्हणजे काही समस्या आहे का?

डॉ. वैदेही मराठे यांच्या म्हणण्यानुसार, पहिल्या शारीरिक संबंधांनंतर रक्तस्राव न होणे हे स्वतःमध्ये समस्या असल्याचे लक्षण नाही. प्रत्येक महिलेच्या शरीराची रचना वेगळी असते, त्यामुळे रक्तस्राव झाला नाही म्हणून महिलेच्या कौमार्याबाबत प्रश्न उपस्थित करणे किंवा त्यावरून निष्कर्ष काढणे वैद्यकीयदृष्ट्या योग्य नाही.

महत्त्वाचे : ही माहिती सामान्य आरोग्यविषयक माहितीसाठी आहे. शारीरिक संबंधांनंतर वारंवार किंवा मोठ्या प्रमाणात रक्तस्राव होत असल्यास तसेच वेदना, जळजळ, खाज, ताप किंवा दुर्गंधीयुक्त स्राव यांसारखी लक्षणे असल्यास स्त्रीरोगतज्ज्ञांचा सल्ला घ्यावा.