आलं लसूणच्या पेस्टमध्ये भेसळ! लिव्हर, किडनीला हळू हळू करेल निकामी; रोजच्या जेवणात वापरत असाल तर सावधान…

आता जाणून घेऊया की भेसळयुक्त आले-लसूण पेस्ट तुमच्या आरोग्यावर किती परिणाम करू शकते आणि शरीरातील कोणत्या अवयवांना त्याचा जास्त धोका असतो.

काय समस्या होऊ शकते? (Fake Ginger Garlic Paste Damage Liver, Kidney)

स्वयंपाकघरात रोज वापरली जाणारी आले-लसूण पेस्ट जर भेसळयुक्त असेल, तर ती आरोग्यासाठी गंभीर धोका ठरू शकते. श्री बालाजी मेडिकल कॉलेज ॲंड हॉस्पिटल येथील नोंदणीकृत आहारतज्ज्ञ दीपलक्ष्मी यांच्या मते, अनेकदा या पेस्टचे प्रमाण वाढवण्यासाठी त्यात मैदा किंवा कॉर्नफ्लोअर मिसळले जाते. तसेच पेस्ट ताजी दिसावी आणि जास्त दिवस टिकावी म्हणून कृत्रिम रंग आणि प्रिझर्व्हेटिव्हही घातले जातात. काही वेळा जुने किंवा खराब झालेले आले-लसूण पुन्हा वापरले जाते. अशी पेस्ट खाल्ल्याने गॅस, ॲसिडिटी आणि जुलाब यांसारख्या पचनाच्या तक्रारी होऊ शकतात. दीर्घकाळ सेवन केल्यास याचा परिणाम यकृत आणि मूत्रपिंडांवरही होऊ शकतो.

रासायनिक भेसळीमुळे काही लोकांना ॲलर्जी, त्वचेच्या समस्या किंवा श्वास घेण्यास त्रासही होऊ शकतो. सर्वात महत्त्वाचे म्हणजे, भेसळीमुळे आले-लसणाचे नैसर्गिक फायदे जसे की पचन सुधारण्यास मदत, सूज कमी करणे आणि संसर्गाशी लढण्याची क्षमता कमी होते.

यातही केली जाते भेसळ

जुलै २०२५ मध्येही असा एक प्रकार समोर आला होता. फूड सेफ्टी अधिकाऱ्यांच्या माहितीनुसार, काही ठिकाणी टायटॅनियम डायऑक्साइड आणि मोनो सायट्रेटसारखे हानिकारक पदार्थ वापरले जात होते. Food Safety and Standards Authority of India (FSSAI) च्या नियमांनुसार असे पदार्थ अन्न उत्पादनात वापरण्यास मनाई आहे. तपासादरम्यान टायटॅनियम डायऑक्साइड, मोनो सायट्रेट आणि रंग वाढवण्यासाठी मोठ्या प्रमाणात हळद पावडर जप्त करण्यात आली होती.

घरी कशी तपासणी कराल?

घरी शुद्धता तपासण्यासाठी काही गोष्टी लक्षात ठेवा. पेस्टचा रंग हलका आयव्हरी (फिकट पांढरट) असावा, खूप गडद किंवा बदललेला नसावा. त्यात बुरशी, चिकटपणा किंवा खराब वास नसावा.

पेस्टची बनावट मऊ आणि एकसारखी असावी, तसेच सुगंध ताज्या आले-लसणासारखा तीव्र असावा. चव कडू किंवा शिळी वाटू नये.

पॅकबंद पेस्ट खरेदी करताना घटकांची यादी नक्की वाचा. शुद्ध पेस्टमध्ये मुख्यत्वे आले आणि लसूणच असावे. अतिरिक्त कृत्रिम रंग किंवा प्रिझर्व्हेटिव्ह शक्यतो कमी प्रमाणात असावेत.