Dry Fruits Benefits Women Health: महिलांच्या आरोग्यासाठी ‘हा’ सुकामेवा सर्वोत्तम!

प्रोटिन व स्निग्धतेचे प्रमाण अधिक

अक्रोडचे बरेचसे गुण बदामासारखे आहेत. अक्रोड जास्त शुक्रकर आहे. अक्रोड कफपित्तवर्धक, वीर्यवर्धक, बल्य आहे. हृद्रोग, रक्तदोष, वातरक्त यावर उपयुक्त आहे. अक्रोड जास्त प्रमाणात घेतले तर शरीराचा दाह होतो. रेच होतात. वजन वाढविण्याकरिता अक्रोड चांगले. धातू क्षयामुळे उद्भवलेल्या वातविकारात, आमवातात अक्रोड पथ्यकर आहे. अक्रोड कामवासना वाढविणारा आहे. अक्रोडात प्रोटिन व स्निग्ध पदार्थ जास्त आहेत.

अक्रोडाच्या गराचा लेप

शरीरात वेगवेगळ्या प्रकारच्या गाठींवर अक्रोड गराचा लेप उपयुक्त आहे. विशेषत: गंडमाळावर अक्रोड वाटून त्याचा लेप करावा. तसेच अक्रोड खावयास द्यावेत. बाळंतीणीस दूध कमी येत असल्यास गव्हाच्या चपातीत अक्रोड गर मिसळून पोळी खावी. सात दिवसात स्तन्यवृद्धी होते. स्वप्नदोष व वारंवार लघवी होणे या तक्रारींकरिता तूप- खडीसाखरेबरोबर अक्रोड चूर्ण खावे.

पोट साफ होण्यासाठी…

क्रूर कोठा असणाऱ्यांनी रेचक म्हणून अक्रोड तेलाचा प्रयोग जरूर करावा. पहाटे दुधाबरोबर अक्रोड तेल तीन-चार चमचे घ्यावे. कोठा न ओरबाडता सुखाने पोट साफ होते. चक्कर येणे, भोवळ येणे, फिरल्यासारखे होणे, मस्तक हलके होणे याकरिता मोठ्या प्रमाणावर नियमितपणे अक्रोड खावे. मासिकपाळीत स्त्राव कमी येणे, साफ न होणे या तक्रारी असणाऱ्या कृश स्त्रियांनी अक्रोड नियमित खावे.

अक्रोड तेलाचा उत्तम उपयोग

अक्रोडच्या तेलाचे एरंडेलाच्या गुणाशी साम्य आहे. एरंडेलाने अशक्ती येते. अक्रोड तेलाने ताकद येते. हा फरक आहे. लांबलचक चपटे टेप वर्म किंवा जंत तसेच फाजील पित्त बाहेर काढण्याकरिता अक्रोड तेलाचा मोठ्या मात्रेत प्रयोग करावा. ज्यांचे केस दुबळे झाले आहेत त्यांनी अक्रोड नियमित खावे.

आहळीव

आहळीव किंवा आळीव बाळंतिणीकरिता खूप थंडीत लाडू किंवा लापशी करून देण्याकरिता वापरले जाते. दिवाळीत मातीच्या किल्ल्यावर लवकर उगवणारे धान्य म्हणून आम्ही लहानपणी वापरत असू.
खूप उचकी लागली तर आळिवाचा उकळून काढा द्याावा. आळिवात एक उडून जाणारे तेल आहे. या तेलाने अन्ननलिका, आमाशय, स्निग्ध होऊन उचकी निर्माण करणाऱ्या वायूला आवर पडतो. बाळंपणात कंबरदुखी, पाठदुखी, गर्भाशयाला पूर्ववत आणण्याकरिता वायू ठिकाणावर आणण्याकरिता आळिवाची पेज घ्यावी. आळीव वाटून त्याचा लेप दुखऱ्या सांध्यांवर लावावा.

वजन वाढविण्यासाठी…

बाळंतपणातून उठलेल्या स्त्रियांना दूध कमी येत असेल तर आळीव, ओल्या खोबऱ्याचे दूध व गूळ असे मिश्रण शिजवून दाट लापशी करून प्यावे. ज्यांना हिवाळ्यात व्यायाम करून शरीर कमवायचे आहे त्यांनी आळीव, ओले खोबरे, गूळ व भरपूर चांगले तूप असे लाडू करून खावे. तिखट, आंबट, खारट पदार्थ टाळावे. चहा पिऊ नये. निश्चयाने वजन वाढते. आळिवाचा काढा घेतला की, लघवी साफ होते. पोट दुखून जुलाब होत असल्यास व आतड्यांच्या व्रणात आळिवाच्या काढ्याचा उपयोग होतो. कंबरदुखी, सायटिका या विकारात आळीव उपयुक्त आहेत. डोळे येणे किंवा डोळ्यांच्या सुजेवर बाहेरून आळिवाचे पोटीस बांधावे. उपयोग होतो.

खारीक

बाजारात सामान्यपणे दोन प्रकारची खारीक मिळते. साखरी खारीक व कोरी खारीक. साखरी खारीक चावायला मऊ व थोडी तुलनेने अधिक गोड असते. कोरी खारीक खूप कडक व कमी गोड चवीची असते.
खारीक ही खजुराच्या जातीतील असली तरी स्त्रियांकरिता त्याचे वेगळे विशेष स्थान आहे. ज्या मुलींची मासिक पाळी साफ येत नाही त्यांनी नियमितपणे खारीक चूर्ण तुपाबरोबर खावे किंवा किमान एक खारीक रोज खावी. दोन-तीन महिने असा प्रघात ठेवला तर मासिक पाळी नियमित होते. मासिक पाळीच्या त्रासामुळे ज्यांना गर्भधारणा होत नाही त्यांना नियमित खारीक खाल्ल्यामुळे दिवस राहतात. खारीक खाल्ल्यामुळे वजन वाढेल असे नाही, पण खारकेसारखे शरीर खुटखुटीत व ताठपणे काम करणारे बनते.

रक्तपित्तावर उत्तम उपाय

खारकांचे बारीक तुकडे व तितकेच आल्याचे लहान तुकडे, भरपूर लिंबाचा रस व त्यात अष्टमांश प्रमाणात सुंठ, मिरे, पिंपळी, जिरे व बडीशेप असे चूर्ण, चवीपुरते मीठ व तुपावर भाजलेला हिंग असे लोणचे मुरल्यावर खावे. उत्तम रुची येते. भूक लागते. रक्तपित्त विकारात खारीक व तूप खावे. लहान मुलांचे दात बळकट व्हावयास हवे असतील तर रोज एक खारीक चावून, चघळून खावयास लावावी. चॉकलेट व केकपेक्षा हा खुराक उत्तम.