Stomach Related Problem: वाढत्या वयासह पचनसंस्थेतही अनेक बदल होतात ज्याचा शरीर अन्न कसे प्रक्रिया करते आणि पोषक तत्वे कसे शोषते यावर परिणाम करू होतो. ५० वर्षांनंतरच्या अनेक व्यक्तींना बद्धकोष्ठता, अतिसार व अॅसिड यांसारख्या आतड्यांसंबंधीच्या सामान्य समस्यांचा त्रास होऊ लागतो.
योग्य आहार आणि जीवनशैलीत योग्य ते बदल करून, ही लक्षणे अनेकदा प्रभावीपणे व्यवस्थापित केली जाऊ शकतात, ज्यामुळे एकूण आरोग्य सुधारते. फायबरचे सेवन समायोजित करण्यापासून ते खाण्याच्या सवयी लक्षात ठेवून सल्लागार, आहारतज्ज्ञ व मधुमेह शिक्षक कनिक्का मल्होत्रा यांच्या सल्ल्याने तुम्ही आतड्यांसंबंधीच्या समस्यांचे व्यवस्थापन कसे करू शकता, ते जाणून घ्या.
१. बद्धकोष्ठता
आतड्यांच्या हालचाली मंदावणे आणि पचनसंस्थेतील स्नायूंची ताकद कमी होणे यांमुळे अनेकांना बद्धकोष्ठता या समस्येचा वारंवार त्रास होत असतो.
उच्च फायबरयुक्त पदार्थ : भरपूर फळे, भाज्या, संपूर्ण धान्य आणि शेंगा यांचा समावेश करा. हे सर्व पदार्थ आतड्यांच्या नियमित हालचालींना चालना देतात.
हायड्रेशन : दिवसभर पुरेसे पाणी प्यायल्याने बद्धकोष्ठता टाळण्यास मदत होते.
प्रो-बायोटिक्स : दही व केफिर यांसारखे प्रो-बायोटिक्सने समृद्ध असलेले अन्न आतड्यांतील जीवाणू संतुलित करते आणि त्यायोगे आतड्यांना आरोग्य सुधारण्यास हातभार लागतो.
व्यवस्थित शिजवलेले जेवण : व्यवस्थित शिजवलेले अन्न पचायला सोपे असते, ज्यामुळे जठरांत्रांच्या अस्वस्थतेचा धोका कमी होतो.
२. अतिसार
अतिसाराचा त्रास असलेल्यांना खालील आहारविषयक धोरणे त्यांच्या त्रासाची लक्षणे व्यवस्थापित करण्यास मदत करू शकतात :
हे पदार्थ टाळा : मसालेदार पदार्थ, कॅफिन व अल्कोहोल कमी करा. कारण- ते पचनसंस्थेला त्रास देऊ शकतात.
हलके अन्न : केळी आणि भात यांसारखे सहज पचणारे पदार्थ निवडा. असे पदार्थ पचायला हलके असतात आणि मल घट्ट करण्यास मदत करतात.
पाण्याचे प्रमाण चांगले ठेवा : अतिसारामुळे डिहायड्रेशन होऊ शकते. म्हणून शरीरातून बाहेर पडलेल्या पाण्याची कमतरता भरून काढण्यासाठी भरपूर पाणी पिणे आवश्यक आहे.
३. छातीत जळजळ
छातीत जळजळ किंवा अॅसिड रिफ्लक्स ही आणखी एक समस्या आहे जी सामान्यतः ५० वर्षांनंतर अन्ननलिकेतील स्नायू कमकुवत झाल्यामुळे होते. अॅसिड रिफ्लक्स (Acid Reflux) म्हणजे पोटात तयार होणारे आम्ल (ऍसिड) अन्ननलिकेमध्ये (ओसोफेगस) परत जाणे. हे अन्ननलिकेच्या स्नायूंच्या चुकीच्या हालचालीमुळे होते, ज्यामुळे पोटातून ऍसिड घशाकडे येऊ शकते.
ट्रिगरयुक्त अन्न ओळखा : आम्लयुक्त पदार्थ (जसे की लिंबूवर्गीय फळे आणि टोमॅटो), मसालेदार पदार्थ व जास्त चरबीयुक्त पदार्थ यांचा समावेश अस्वास्थ्यकर पदार्थांमध्ये होतो. कारण- ते आपले स्वास्थ्य म्हणजेच आपले आरोग्य बिघडवणारी सर्व लक्षणे वाढवण्यास कारणीभूत ठरू शकतात.
आहाराचे प्रमाण नियंत्रित करा : जास्त खाल्ल्याने पोटाचा दाब वाढतो आणि त्यामुळे अॅसिडिटी होऊ शकते. कमी प्रमाणात आणि वारंवार थोडे थोडे खात राहिल्याने मदत होऊ शकते.
अन्न नीट चावा : अन्न हळूहळू आणि पुरेसे चावल्याने पचन होण्यास मदत होते आणि छातीत जळजळ होण्याचा धोका कमी होतो.
या पौष्टिक धोरणांचा अवलंब करून, ज्येष्ठ नागरिक आतड्यांसंबंधीच्या समस्या कमी करू शकतात आणि त्यांचे एकूण आरोग्य सुधारू शकतात.
