शारीरिक कष्ट न करताही थकवा, आळस आणि अशक्तपणा येतो? मग असू शकते ‘या’ पोषक तत्वाची कमतरता… शरीर देते संकेत

अशक्तपणा

ओमेगा-३ फॅटी अ‍ॅसिड्स आपल्या शरीरात नैसर्गिकरित्या तयार होत नाही. म्हणून ते अन्नाद्वारे सेवन करणे गरजेचे आहे. जेव्हा आपल्या आहारात कमतरता येते तेव्हा त्याचा पहिला परिणाम ऊर्जेच्या पातळीवर होतो. जास्त हालचाल न करताही थकवा, सुस्ती आणि अशक्तपणा जाणवणे ही ओमेगा-३ च्या कमतरतेची सुरुवातीची लक्षणे असू शकतात.

सांधेदुखी

सांधेदुखी, कडकपणा आणि सूज ही देखील ओमेगा-३ फॅटी अॅसिडच्या कमतरतेची सामान्य लक्षणे आहेत. सकाळी जड वाटणे किंवा गुडघे आणि पाठदुखी जाणवणे ही या कमतरतेची लक्षणे असू शकतात. ओमेगा-३ फॅटी अॅसिडचे दाहक-विरोधी गुणधर्म निरोगी सांधे राखण्यास मदत करतात. अनेक लोकांना असे वाटते की त्यांच्या शरीरातील वेदना आणि कडकपणा थकव्यामुळे होतो. मात्र प्रत्यक्षात ही ओमेगा-३ फॅटी अॅसिडच्या कमतरतेची लक्षणे आहेत.

त्वचा कोरडेपणा

त्वचा आणि केसांमध्येही ओमेगा-३ च्या कमतरतेची लक्षणे स्पष्टपणे दिसून येतात. जास्त कोरडेपणा, खाज सुटणे आणि वारंवार त्वचेच्या समस्या ही सामान्य लक्षणे आहेत. कधीकधी, चेहऱ्याची त्वचा इतकी कोरडी होते की जखमा दिसतात. कोंडा, केस गळणे आणि निस्तेज, ठिसूळ केस हे देखील ओमेगा-३ च्या कमतरतेशी जोडले जाऊ शकतात.

मानसिक आरोग्य

वारंवार मूड बदलणे, चिडचिडेपणा, लक्ष केंद्रित करण्यात अडचण आणि स्मरणशक्ती कमी होणे ही देखील ओमेगा-३ च्या कमतरतेची लक्षणे आहेत. काही प्रकरणांमध्ये झोपेच्या समस्या आणि अस्वस्थता देखील दिसून येते. कधीकधी लोकांना जास्त झोप येते, तर काहींना झोप न येण्याचा अनुभव येतो.

आहार घेणे आवश्यक

ओमेगा-३च्या कमतरतेवर मात करण्यासाठी तुमच्या आहारात अळशीच्या बिया, चिया सीड्स, अक्रोड, राजमा आणि सोयाबीनचा समावेश करता येईल. मांसाहारी लोकांसाठी सॅल्मन, मॅकरेल, सार्डिन आणि ट्यूना सारखे चरबीयुक्त मासे ओमेगा-३ चे उत्कृष्ट स्रोत आहेत. याव्यतिरिक्त डॉक्टरांच्या सल्ल्याने माशांचे तेल आणि माशांच्या तेलाचे पूरक आहार घेता येतो.