जर तुम्हालाही अक्कलदाढ असेल, तर हे वाचाच…, तज्ज्ञांनी सांगितले अक्कलदाढ काढल्यानंतर २४ ते २८ तास काय करावे…

डॉ. गुणीता सिंग, बीडीएस, एमडी डेंटल लेझर्स यांनी स्पष्ट केले की, अक्कलदाढ ही तिसरी दाढ असते. “अक्कलदाढ चार असतात, प्रत्येक क्वाड्रंटमध्ये एक. अक्कलदाढ येणे काही लोकांसाठी खूप वेदनादायक अनुभव ठरू शकते,” असे डॉ. सिंग म्हणाल्या.

जसजसा मानव विकसित होत गेला, तसतसा त्याच्या जबड्याचा आकार हळूहळू अरुंद होत गेला. “त्यामुळे, तिसऱ्या दाढेसाठी आता जागा उरलेली नाही. म्हणूनच ती दाढ हाडावर किंवा आसपासच्या दातांवर येऊ लागते. दोन्ही स्थितींमध्ये तीव्र वेदना होऊ शकते. त्यामुळे जेव्हा तुमच्या अक्कलदाढेमुळे त्रास होऊ लागतो, तेव्हा त्याला काढून टाकण्याची शिफारस केली जाते,” असे डॉ. सिंग यांनी सांगितले.

जर ऑर्थोडॉन्टिक उपचार, जसे की ब्रेसेस, आवश्यक असतील तर अक्कलदाढेला काढून टाकण्याची शिफारस केली जाऊ शकते. कारण ती सरळ केलेल्या दातांच्या समांतरतेला त्रास देऊ शकते, असे डॉ. अफसार मुल्ला, कन्सल्टंट मॅक्सिलोफेशियल प्रॉस्थोडोंटिस्ट आणि इंप्लांटोलॉजिस्ट, मणिपाल हॉस्पिटल, गोवा यांनी सांगितले. “दंतचिकित्सकांनी जे दात हिरड्यांमधून बाहेर आलेले नाहीत किंवा त्यांना बाहेर येण्यास अडचण आहे, त्याला अक्कलदाढ म्हटले आहे,” असे डॉ. मुल्ला यांनी सांगितले.

जरी अक्कलदाढ हिरड्यांमधून बाहेर आली, तरी जर ती चुकीच्या ठिकाणी असेल तर त्यामुळे ब्रश करणे कठीण होऊ शकते आणि पूर्ण तोंडाच्या स्वच्छतेसाठी अडचण निर्माण होऊ शकते. “यामुळे अन्नाचे कण अडकण्याचा, बॅक्टेरिया वाढण्याचा, दातांची कीड आणि हिरड्यांचा रोग निर्माण होण्याचा धोका वाढतो. जर अक्कलदाढ हिरड्यांमधून बाहेर आली असेल तर तुमचे दंतचिकित्सक त्याची स्थिती लक्षपूर्वक तपासतील,” असे डॉ. मुल्ला यांनी सांगितले.

अक्कलदाढ काढल्यानंतर काय करावे?

रक्तस्राव : तुमच्या तोंडात ठेवलेली गॉज पॅड (मेडिकल फॅब्रिक) ३० मिनिटे हलक्या दाबाने चावा. “सुमारे २४ तास रक्तगळती होऊ शकते. थुंकणे आणि जास्त शारीरिक हालचाल टाळा, कारण यामुळे रक्तस्राव वाढू शकतो आणि जास्त वेळेपर्यंत राहू शकतो,” असे डॉ. सिंग यांनी सांगितले.

वेदना : ऑपरेशननंतर वेदना होऊ नये म्हणून एक तासाच्या आत दिलेली वेदनाशामक औषधे घ्या.

तोंडाची स्वच्छता : दात काढलेल्या जागेवर २४ तासांपर्यंत चूळ भरू नका. “त्यानंतर उबदार पाण्यात एक चमचा मीठ घेऊन तीन वेळा दररोज गुळण्या करा. याचा वापर एक आठवडा करा,” असे डॉ. सिंग यांनी सांगितले.

आहार : दात काढलेल्या बाजूने तीन ते चार दिवस अन्न खाणे टाळा. “सामान्य आहार घेण्याचा प्रयत्न करा. दुसऱ्या बाजूने चावून खा आणि भरपूर पाणी प्या. तसेच २४ तासांसाठी कार्बोनेटेड ड्रिंक्स आणि मद्यपान टाळा,” असे डॉ. सिंग यांनी सांगितले.

सूज आणि रंग बदलणे : दात काढल्यानंतर सूज आणि कधी कधी रंग बदलण्याची शक्यता असते. “सूज साधारणपणे तीन दिवस राहते. या समस्येला कमी करण्यासाठी १५ मिनिटांसाठी बर्फाचे पॅक लावा. आठ तासांसाठी सतत बदलत रहा,” असे डॉ. सिंग यांनी सांगितले.

सुईचे टाके : काही दात काढण्याच्या पद्धतींमध्ये सुईचे टाके लागतात. “जर तुमच्या सुईच्या टाक्यांना काढण्याची आवश्यकता असेल तर तुम्हाला एक अपॉइंटमेंट दिली जाईल,” असे डॉ. सिंग यांनी सांगितले.

धूम्रपान : पहिल्या ४८ तासांमध्ये धूम्रपान टाळा.

ताप : २४-४८ तासांसाठी हलका ताप येऊ शकतो; जर तो तसाच राहिला तर दंतचिकित्सकाशी संपर्क करा, असे डॉ. मुल्ला यांनी सांगितले.