दह्याबरोबर ‘हे’ पदार्थ खाणं खरंच फायद्याचे की हानिकारक; आहारतज्ज्ञांनी केलं स्पष्ट

आयुर्वेदात आहारविषयक अनेक नियम सांगितले आहेत, ज्यात काही फूड कॉम्बिनेशन अत्यंत फायदेशीर मानले जातात; तर काही हानिकारक आहेत. दही आरोग्यासाठी फायदेशीर आहे; परंतु चुकीच्या पदार्थांबरोबर ते खाल्ल्याने अॅसिडिटीसारख्या आरोग्य समस्या उदभवू शकतात. आहारतज्ज्ञ श्वेता शाह यांनी दही खाण्याची योग्य पद्धत समजावून सांगितली आहे.

दह्यात ‘ही’ गोष्ट मिसळून खाऊ नका

आहारतज्ज्ञ श्वेता शाह सांगतात की, दही हा एक अतिशय आरोग्यदायी पदार्थ आहे; परंतु कधी कधी चुकीच्या पदार्थाबरोबर खाल्ल्यास त्रास होऊ शकतो. दही खाल्ल्यानंतरही आम्लपित्त किंवा गॅस होऊ शकतो. त्यामुळे सल्ला दिला जातो की, दही मिठाबरोबर खाऊ नये. उन्हाळ्यात अनेक जण रायता बनवून खातात; पण मीठ आणि दही हे आरोग्यदायी मानले जात नाही.

‘या’ पदार्थांनी मिळेल थंडावा

आहारतज्ज्ञ श्वेता शाह सांगतात की, दह्यामध्ये साखर किंवा खडीसाखर मिसळून खाल्ल्याने थंडावा मिळतो. म्हणून जर तुम्हाला उन्हाळ्यात दही आवडत असेल, तर ते साखर किंवा खडीसाखर मिसळून खाण्याचा प्रयत्न करा.

पित्त नियंत्रित करेल दही

आहारतज्ज्ञ श्वेता शाह सांगतात की, आवळा पावडरबरोबर दही खाल्ल्याने तुमच्या शरीरातील पित्त नियंत्रित होण्यास मदत होते. आवळ्यामध्ये क जीवनसत्त्व असल्याने हे मिश्रण तुमची रोगप्रतिकारक शक्ती वाढण्यास मदत करते. आवळा त्वचेसाठी आणि केसांसाठीदेखील फायदेशीर आहे.

दही वडा सर्वांत खराब कॉम्बिनेशन

दही वडा अनेक जण आवडीने खातात. त्याबाबत आहारतज्ज्ञ श्वेता शाह सांगतात की, दही हे उडदाच्या डाळीपासून बनवलेल्या वड्याबरोबर खाणं आरोग्यासाठी घातक आहे. तुम्ही त्याऐवजी मूग डाळीचे वडे बनवू शकता. हे तुमच्यासाठी फायदेशीर ठरेल.

दही खाण्याची योग्य वेळ

तुम्ही दुपारच्या जेवणाच्या वेळी दही खाऊ शकता. ती दही खाण्याची योग्य वेळ आहे. तसेच तुम्ही नाश्त्यातही दही खाऊ शकता. सकाळी उठल्यावर सर्वांत आधी काहीतरी हलके खा. त्यानंतर दुपारच्या जेवणात दह्याचा समावेश करा. रात्री दही खाणे हे आरोग्यासाठी योग्य नाही. विशेषतः जर तुम्हाला कफ, सर्दी, खोकला किंवा घसा खवखवणे यांसारख्या समस्या असतील, तर रात्री दही खाणे टाळा.