सकाळी उठल्या उठल्या पाणी पिताय? मग थांबा, रिकाम्या पोटी थंड की गरम कोणते पाणी पिणे योग्य, जाणून घ्या…

सकाळी पाणी पिणे का फायदेशीर आहे?

सकाळी उठल्या उठल्या पाणी प्यायल्याने पचनक्रिया सुरू होते. त्यामुळे शरीरातील नैसर्गिक डिटॉक्स प्रक्रियेला चालना मिळते आणि शरीर दिवसभरासाठी तयार होते. ही सवय पचनसंस्थेला हळूहळू जागं करून, रोज वेळेवर शौच क्रिया वेळेत पार पडावी यासाठी आणि दिवसभर ऊर्जा टिकवून, ताजेतवाने राहायला मदत करते.

कोमट पाणी

रिकाम्या पोटी कोमट पाणी पिणे हा सर्वांत चांगला पर्याय मानला जातो. ते पचनसंस्थेसाठी हलकं असतं आणि शरीर ते सहजपणे शोषून घेतं. सकाळी कोमट पाणी प्यायल्यानं आतड्यांच्या स्नायूंना आराम मिळतो. त्यामुळे पचन सोपं होतं आणि बद्धकोष्ठता कमी होते.

हे शरीरात रात्रीभर साचलेले टॉक्सिन बाहेर काढण्यासही मदत करतं. कोमट पाणी शरीराचं तापमान थोडं वाढवून मेटाबॉलिझम वाढवू शकतं. त्यामुळे वजन नियंत्रणात ठेवायला मदत होते. त्याशिवाय हे रक्तवाहिन्या नैसर्गिकरीत्या रुंद करून रक्तप्रवाह सुधारायलाही मदत करतं.

थंड पाणी

थंड पाण्याचेही काही फायदे आहेत; पण उठल्याबरोबर लगेच ते पिणे हा सर्वोत्तम पर्याय नसू शकतो. खूप थंड पाणी पचनसंस्थेला अचानक धक्का देऊ शकतं. त्यामुळे पचन मंदावू शकतं किंवा घशात जळजळ होऊ शकते.

तरीही, थंड पाणी थोड्या प्रमाणात कॅलरी बर्न करण्यास मदत करतं. कारण- शरीर ते गरम करण्यासाठी ऊर्जा वापरतं. सकाळी वर्कआउटनंतर थंड पाणी पिणं विशेषतः फायदेशीर ठरतं. कारण- ते शरीर थंड ठेवायला आणि लवकर हायड्रेट होण्यासाठी मदत करतं.

पाण्याचे तापमान पचनावर कसा परिणाम करतो?

पाण्याचं तापमान पचनसंस्थेच्या प्रतिक्रियेमध्ये मोठी भूमिका बजावते. कोमट पाणी पचनासाठी लागणारे एन्झाइम सक्रिय करण्यात आणि अन्न सहज पचायला मदत करतं. तर, थंड पाण्यामुळे काही वेळासाठी रक्तवाहिन्या आकुंचन पावू शकतात. त्यामुळे पचनाची प्रक्रिया थोडी मंदावते. म्हणूनच रिकाम्या पोटी साधारणपणे गरम किंवा कोमट पाणी पिणे अधिक योग्य मानले जाते.