How to Clean Water Tank at Home : पावसाळ्यात लोकांना अनेकदा त्यांच्या टेरेसवर असणाऱ्या पाण्याच्या टाक्यांमधून विचित्र वास येताना जाणवतो. काही लोकांना पाण्यात माशांसारखा वास येतो, कधीकधी पाण्याची चवही वेगळी लागते. याचे मूळ कारण टाकी व्यवस्थित स्वच्छ केली नाही किंवा देखभालीकडे दुर्लक्ष करण्यामुळे होते. त्यामुळे हा वास पुन्हा येऊ शकतो. पावसाळ्यातील वाढलेली आर्द्रता व पावसामुळे पाण्याच्या स्रोतांमध्ये घाण, धूळ, पाने, सूक्ष्मजंतू जाण्याचा धोका वाढतो. त्यामुळे, फक्त टाकी स्वच्छ करणे पुरेसे नाही. साफसफाई करण्यापूर्वी, साफसफाई करताना आणि साफसफाईनंतर काही गोष्टी लक्षात ठेवणे महत्त्वाचे आहे.
टाकी स्वच्छ करण्यापूर्वी या गोष्टींची घ्या काळजी…
टाकी रिकामी ठेवा
टाकीत थोडे पाणी ठेवा आणि बाकीचे पाणी काढून टाका. उरलेले पाणी तळाशी साचलेली घाण स्वच्छ करण्यास मदत करते.
टाकीत एकटे उतरू नका
जर तुम्हाला साफसफाईसाठी टाकीत जावेच लागले. तर घसरणार नाही याची काळजी घ्या. नेहमी जवळ दुसरी व्यक्ती बरोबर ठेवा. बंद टाकीत एकटे जाणे टाळा.
या गोष्टी बरोबर ठेवा
पावसाळ्यात टाकी स्वच्छ करण्यासाठी एक लांब ब्रश, एक बादली किंवा मग, एक स्वच्छ कापड आणि रबरचे हातमोजे स्वतःजवळ ठेवा.
टाकी स्वच्छता करताना खालील खबरदारी घ्या…
घासून स्वच्छ करणे
टाकीच्या भिंत, तळावरील शेवाळ, घाण किंवा गाळ ब्रशने काढून टाका.
डिटर्जंट वापरू नये
कपडे धुण्याचा साबण किंवा डिटर्जंट वापरल्याने पाण्यात अवशेष राहू शकतात. तुमची इच्छा असल्यास, फक्त पिण्याच्या पाण्याच्या टाक्यांसाठी योग्य असलेली उत्पादने वापरा आणि शिफारस केलेल्या प्रमाणातच वापरा.
पूर्णपणे धुवून घ्या
स्वच्छता केल्यानंतर राहिलेले अवशेष काढून टाकण्यासाठी टाकी स्वच्छ पाण्याने अनेक वेळा धुवा.
स्वच्छता केल्यानंतर, या गोष्टी करा…
- झाकण घट्ट बंद करा.
- पावसाचे पाणी, धूळ, कीटक किंवा पाने आत जाण्यापासून रोखण्यासाठी टाकीचे झाकण पूर्णपणे बंद ठेवा.
- पाईप्स आणि ओव्हरफ्लो लाईन तपासा.
- गळती, तुटलेली फिटिंग्ज किंवा उघड्या ओव्हरफ्लो पाईप्समुळे घाण आत जाऊ शकते. आवश्यक असल्यास जाळी लावा.
सुरुवातीचे काढून टाका पाणी
साफसफाई करताना जर कोणतेही जंतुनाशक वापरले असेल, तर टाकी भरल्यानंतर सुरुवातीचे पाणी काढून टाकणे उत्तम.
सभोवतालचा परिसर ठेवा स्वच्छ
टाकीच्या आजूबाजूला पाणी साचू देऊ नका. यामुळे डास आणि इतर कीटकांच्या प्रजननाचा धोका कमी होऊ शकतो.
नियमितपणे तपासा
दर १५ ते २० दिवसांनी, टाकीचे झाकण उघडून आत पाणी आहे का ते तपासा. घाण झाली आहे का ते सुद्धा पाहा.
स्वच्छता किती वेळा करावी?
सर्वसाधारणपणे, आपल्या घरातील पाण्याची टाकी दर सहा महिन्यांतून एकदा स्वच्छ करण्याची शिफारस केली जाते. पण, पावसाळ्यात पाण्याला किंचितही वास येत असल्यास, ती स्वच्छ करावी. पाण्यात शेवाळ दिसत असल्यास, आवश्यकतेनुसार लवकर स्वच्छता करता येते.
