पावसाळ्यामुळे चेहरा तेलकट होतोय? मग आजच ट्राय करा ‘हा’ घरगुती उपाय; ‘या’ ३ गोष्टींने लगेच दूर होईल तेलकटपणा

अनेक जण या त्रासापासून सुटका मिळवण्यासाठी महागडे रसायनलयुक्त प्रॉडक्ट्स, फेसवॉश किंवा क्रीम वापरतात. परंतु, हे उपाय काही वेळापुरतेच काम करतात. काही वेळा तर त्याचा दुष्परिणामही होतो. त्यामुळे नैसर्गिक घरगुती उपाय वापरल्यास ते अधिक सुरक्षित, प्रभावी आणि स्वस्त ठरतात. चला तर पाहूया असे काही सोपे घरगुती उपाय, जे उन्हाळा आणि पावसाळ्यातील तेलकट त्वचेवर मात करण्यास मदत करतील.

१. बेसन आणि गुलाबपाणी

बेसन हा त्वचेवरील अतिरिक्त तेल शोषून घेण्याचे काम करतो. गुलाबपाणी मात्र त्वचेला टोनिंग देऊन ताजेतवाने ठेवते. दोन चमचे बेसन घेऊन, त्यात गुलाबपाणी मिसळा. त्याची गुळगुळीत पेस्ट तयार करून, १०-१५ मिनिटे चेहऱ्यावर लावा. त्यानंतर स्वच्छ पाण्याने धुवा. हा उपाय आठवड्यातून २-३ वेळा केल्यास चेहऱ्यावरील चिकटपणा कमी होतो आणि त्वचा मऊ व तजेलदार दिसते.

२. अॅलोवेरा जेल

अॅलोवेरा हे नैसर्गिक मॉइश्चरायझर मानले जाते. हे त्वचेला हायड्रेट ठेवते आणि अतिरिक्त तेल कमी करण्यास मदत करते. रात्री झोपण्यापूर्वी अॅलोवेरा जेल चेहऱ्यावर हलक्या हाताने लावा. सकाळी उठल्यावर चेहरा स्वच्छ धुवा. त्याच्या नियमित वापरामुळे चेहरा तेलकट न राहता, चमकदार आणि ग्लोइंग होतो.

३. मुलतानी माती

मुलतानी माती त्वचेतील मळ आणि अतिरिक्त तेल खेचून घेते. ती त्वचेच्या रोमछिद्रांमध्ये साचलेली घाण काढून टाकते. एक चमचा मुलतानी माती घ्या, त्यात थोडा लिंबाचा रस आणि गुलाबपाणी मिसळा. त्याचा फेसपॅक बनवून, आठवड्यातून दोनदा चेहऱ्यावर लावा. १५ मिनिटांनी पाण्याने धुवा. हा उपाय केल्याने चेहऱ्यावरील चिकटपणा दूर होतो आणि त्वचेवर ताजेपणा येतो.

उन्हाळा आणि पावसाळ्यात तेलकट त्वचेचा त्रास हा सामान्य आहे. मात्र, त्यावर महागडी कॉस्मेटिक प्रॉडक्ट्स वापरण्याऐवजी घरगुती नैसर्गिक उपाय केले, तर परिणाम अधिक चांगले मिळू शकतात. बेसन, गुलाबपाणी, अॅलोवेरा व मुलतानी माती यांसारख्या साध्या आणि सहज उपलब्ध घटकांचा वापर करून, आपण तेलकटपणा कमी करून त्वचेला ताजेपणा देऊ शकतो.