Money Saving Tips From Salary : सध्या ट्रेंड्स फॉलो करण्याच्या नादात लोक महिन्याच्या सुरुवातीला पगार जमा होताच आधी खरेदीला जातात. त्यामुळे महिन्याची सुरुवात चांगली होते; पण महिन्याच्या शेवटपर्यंत खूप अडचणी येतात. लहानसहान गोष्टींसाठी पैसा आणायचा कुठून, असा प्रश्न पडतो. शेवटी गरज लागल्यास आपण पैसे उसने घेतो किंवा क्रेडिट कार्डवर अवलंबून राहतो.
जर तुम्हाला हा ताण टाळायचा असेल, तर काही गोष्टी गोष्टींचे पालन करून तुम्ही पैशांची बचत करू शकता, तसेच महिनाभर व्यवस्थित पैसा वापरू शकता.
महिन्याच्या शेवटी पैशांची कमतरता भासू नये यासाठी ‘अशाप्रकारे’ वापरा पगार
१) बचत बाजूला ठेवा
पगार मिळाल्याबरोबर बहुतेक लोक जी पहिली चूक करतात ती म्हणजे आधी बजेट न बनवता खर्च करायला सुरुवात करणे. महिन्याच्या शेवटी तुमच्याकडे पैसे शिल्लक राहावेत, असे वाटत असल्यास पगार मिळाल्याबरोबर तुम्हाला जमेल तेवढी रक्कम बचत म्हणून बाजूला करा आणि ते पैसे इतरत्र गुंतवा. त्यानंतर महिन्याच्या उर्वरित दिवसांसाठी स्वतःचा खर्च भागविण्यासाठी उरलेल्या पैशांचा वापर करा.
२) ५०-३०-२० नियमानुसार पैसा वापरा
बहुतेक लोकांना बजेट बनवणे कंटाळवाणे आणि जुनाट वाटते; पण ते काही अवघड काम नाही. हा एक सोपा हिशेब आहे. तुमच्या पगारातील अर्धी रक्कम (५०%) घरभाडे, किराणा सामान आणि विजेची बिले यांसारख्या अत्यावश्यक घरगुती गरजांसाठी बाजूला ठेवा. ३०% रक्कम प्रवास, पार्ट्या आणि चित्रपट यांसारख्या मनोरंजनाच्या गोष्टींवर खर्च करा आणि किमान २०% बचत करा. त्यामुळे तुम्हाला आतापर्यंत किती पैसा खर्च झाला आणि किती बाकी आहे हे समजण्यास मदत होईल.
३) ऑनलाइन शॉपिंग टाळा
आजकाल मोबाईल ओपन करताच डिस्काउंट आणि सेलचे मेसेज प्राधान्याने समोर येतात. बहुतांशी लोक त्या मेसेजनी प्रभावित होऊन, अनेकदा त्यांना गरज नसलेल्या वस्तूही खरेदी करतात. ही अनावश्यक खरेदी टाळण्याचा सर्वोत्तम मार्ग म्हणजे ‘२४-तासांचा नियम’. जर तुम्हाला एखादी वस्तू आवडली, तर ती लगेच खरेदी करू नका. त्याऐवजी ती अॅड टू कार्ट करा आणि दुसऱ्या दिवशी पुन्हा खरेदीचा विचार करा. या कृतीमुळे ९०% ही शक्यता संभवते की, दुसऱ्या दिवसापर्यंत तुमचा विचारच बदललेला असेल आणि परिणामी अनावश्यक वस्तूंसाठी खर्च होणारे तुमचे पैसे वाचतील.
४ ) आपल्या खर्चाचा हिशोब लावा
दिवसभरात इकडे-तिकडे १०-२० रुपये खर्च करण्यात काय अर्थ आहे, असा प्रश्न अनेकांना पडतो; पण महिन्याच्या शेवटी ही छोटी छोटी वाटणारी रक्कम हजारो रुपयांपर्यंत वाढू शकते. तुमच्या फोनवर एक छोटे ॲप इन्स्टॉल करा किंवा एक डायरी ठेवा आणि तुम्ही तुमचे पैसे कुठे खर्च करता, ते लिहून ठेवा. तुम्ही किती अनावश्यक गोष्टींवर खर्च करत आहात हे जेव्हा तुमच्या लक्षात येईल, तेव्हा पुढच्या महिन्यात तिथे खर्च केल्याबद्दल तुम्हाला वाईट वाटेल आणि अशा रीतीने तुम्ही अनावश्यक खर्च टाळू शकाल.
५) क्रेडिट कार्ड आणि ईएमआयपासून दूर राहा
अनावश्यक खर्चामागे क्रेडिट कार्ड हे सर्वांत मोठे कारण आहे. कारण- आपल्याला वाटते की, सध्या आपल्या खिशातून पैसे जात नाहीत; पण जेव्हा पगार आल्याबरोबर बिल भरावे लागते, तेव्हा आपले संपूर्ण बजेट बिघडते. जी वस्तू तुम्ही रोख किंवा डेबिट कार्डने खरेदी करू शकत नाही, ती क्रेडिटवर घेऊ नका. हप्त्यांच्या ओझ्यामुळेच महिन्याच्या शेवटी तुमच्या हातात काहीच उरत नाही.
६) श्रीमंत दिसण्याच्या प्रयत्नात गरीब होऊ नका
अनेकदा पगार वाढताच लोक महागडे फोन, ब्रँडेड कपडे आणि आलिशान जीवनशैलीमध्ये गुंतवणूक करण्याची घाई करतात. त्यालाच दिखाऊ खर्च म्हणतात. उत्पन्न वाढल्यावर खर्च वाढवण्याऐवजी बचत वाढवणे शहाणपणाचे आहे. लोक काय म्हणतील याची चिंता करण्याऐवजी तुमच्या बँक खात्यात किती पैसे आहेत याचा विचार करा.
७) आपत्कालीन परिस्थितीसाठी पैसे वाचवा
जेव्हा गाडी बंद पडणे किंवा डॉक्टरांकडे जाणे यांसारखा मोठा खर्च उदभवतो, तेव्हा महिन्याचा बजेट बिघडू शकतो. ते टाळण्यासाठी दर महिन्याला इमर्जन्सी फंड नावाच्या एका वेगळ्या खात्यात थोडी रक्कम बाजूला ठेवा. केवळ अत्यंत आवश्यक असेल तेव्हाच ती रक्कम खर्च करा. त्यामुळे तुम्हाला गरजेच्या वेळी कोणाकडे पैशांची भीक मागावी लागणार नाही.
