रात्री केस मोकळे ठेवून झोपता की बांधून? तुमची ‘ही’ एक चूक केस तुटण्याचं कारण ठरू शकते

केस घट्ट बांधून झोपणे योग्य आहे का?

रात्री झोपताना केसांना घट्ट रबर बँड लावणे टाळणे चांगले. झोपेत हालचाल होत असल्याने केसांच्या मुळांवर सतत ताण येऊ शकतो. त्यामुळे केस तुटण्याची शक्यता वाढू शकते. काही वेळा टाळूवर ताण जाणवणे किंवा अस्वस्थता निर्माण होऊन झोपही खराब होऊ शकते. दररोज केस घट्ट बांधण्याची सवय असल्यास केसांवर होणारा ताण कमी ठेवणे महत्त्वाचे आहे.

रात्री अंबाडा बांधून झोपावे का?

अनेक महिलांना झोपण्यापूर्वी रबर बँडने अंबाडा बांधण्याची सवय असते. मात्र, घट्ट अंबाडा बांधून झोपणेही टाळावे. केसांना क्लिप किंवा पिन लावून झोपल्यास केस तुटण्याचा धोका वाढू शकतो. शिवाय, क्लिप किंवा पिन झोपताना टाळूला टोचू शकते आणि त्यामुळे दुखापत किंवा अस्वस्थता होऊ शकते.

मग केस मोकळे ठेवून झोपणे योग्य आहे का?

केस घट्ट बांधायचे नाहीत म्हणून केस पूर्णपणे मोकळे ठेवून झोपणे हा एकमेव पर्याय नाही. केस लांब असतील तर रात्री झोपताना ते उशीवर घासले जाऊन गुंतू शकतात. त्यामुळे सकाळी केस विंचरताना तुटण्याची समस्या वाढू शकते.

केसांसाठी ‘ही’ पद्धत ठरू शकते सोपी

रात्री झोपताना केसांची सैल वेणी घालणे हा एक पर्याय ठरू शकतो. मात्र, वेणी अजिबात घट्ट नसावी. केसांच्या मुळांवर ताण येणार नाही याची काळजी घ्या. वेणी बांधण्यासाठी साध्या घट्ट रबरऐवजी सिल्क किंवा सॅटिनची स्क्रंची वापरता येऊ शकते. यामुळे केसांना अनावश्यक ताण आणि घर्षण कमी ठेवण्यास मदत होऊ शकते.

रात्री केस घट्ट पोनीटेल, अंबाडा किंवा क्लिप लावून झोपण्याऐवजी केसांची सैल वेणी घालणे हा अधिक आरामदायी पर्याय ठरू शकतो. केसांची लांबी, पोत आणि तुटण्याची समस्या यानुसार योग्य पद्धत निवडणे महत्त्वाचे आहे.