बदलत्या जीवनशैलीमुळे अनेक लोकांना विविध आजारांनी ग्रासले असल्याचे सध्या दिसत आहे. त्यामुळेच तुम्ही तुमच्या जीवनशैलीत जोपर्यंत सकारात्मक बदल करत नाही तोपर्यंत विविध आजार तुमचा पाठलाग सोडणार नाहीत. तसेच आपल्या आहारात योग्य गोष्टींचा समावेश केल्यानंही बऱ्याच मोठमोठ्या आजारांपासून दूर राहण्यास मदत होते. कॅन्सर, डायबिटीज, हार्ट अटॅकसारखे मोठे आजार आयुष्यभर लांब राहू शकतात. जर तुम्ही या कच्च्या फळाचं नियमितपणे सेवन केलं, तर हे फळ नेमकं कोणतं आणि त्याचे काय फायदे आहेत जाणून घेऊयात.
केळी हे एक असे फळ आहे, जे उर्जेचे पॉवरहाऊस मानले जाते. या फळाने दिवसाची सुरुवात करण्याचे अनेक आरोग्यदायी फायदे आहेत. केळी हे आरोग्यासाठी खूप उपयुक्त फळ आहे. परंतु प्रश्न असा पडतो की, सकाळी कोणते केळे खाणे जास्त फायदेशीर आहे, कच्चे की पिकलेले? हिरवे, पिवळे, ठिपकेदार, तपकिरी असे केळीचे अनेक प्रकार आहेत. केळी अनेक आजार बरे करते. तसेच मधुमेहाचे रुग्ण केळी खाऊ शकतात का? चला जाणून घेऊया कोणत्या प्रकारचे केळे आरोग्यासाठी फायदेशीर आहे.
तुम्ही मधुमेहाचे रुग्ण असल्यास खा ‘या’ प्रकारचे केळे
जर तुम्हाला मधुमेह असेल, तर तुम्ही हिरवी अन् थोडीशी कच्ची केळी खावीत. हिरवी आणि थोडीशी कच्ची केळी प्रतिरोधक स्टार्चने समृद्ध असतात, जी मधुमेहींमध्ये विरघळणाऱ्या फायबरसारखे काम करते. या प्रतिरोधक स्टार्चचे ग्लुकोजमध्ये रूपांतर होणे याला पिकवणे म्हणतात. कच्च्या केळ्यांमध्ये भाजीचे सर्व गुण असतात.
कच्च्या केळ्यांमध्ये ग्लुकोजचे प्रमाण कमी असते, ज्यामुळे रक्तातील साखरेचे प्रमाण कमी होते. बऱ्याच लोकांना हे माहीत नसते की, फायबर शरीरात बॅक्टेरियांना पोसते. कच्च्या केळ्यांमध्ये भरपूर फायबर असते, म्हणूनच ते आरोग्यासाठी खूप फायदेशीर असतात. जून २०१८ मध्ये न्यूट्रिशन रिसर्चमध्ये प्रकाशित झालेल्या एका पुनरावलोकनात असे दिसून आले आहे की, प्रतिरोधक स्टार्चचा कोलेस्ट्रॉल आणि खराब एलडीएल कोलेस्ट्रॉलवर कमी परिणाम होतो. कच्च्या केळ्यांमध्ये आढळणारे आणखी एक निरोगी फायबर म्हणजे पेक्टिन, जे भूक कमी करू शकते आणि रक्त परिसंचरण सुधारू शकते
कच्च्या केळ्याचे आरोग्यदायी फायदे
न्यूकॅसल आणि लीड्स विद्यापीठातील शास्त्रज्ञांच्या मते, कच्चे केळे खाल्ल्याने अनेक आनुवंशिक आजारांवर उपचार होण्यास मदत होते. कच्चे केळे खाल्ल्याने पचनसंस्था निरोगी राहण्यास मदत होते. सकाळी रिकाम्या पोटी ते खाल्ल्याने वजन नियंत्रित राहण्यास मदत होते. कच्चे केळे खाल्ल्याने कर्करोगाचा धोका कमी होतो. कच्चे केळे खाल्ल्याने हृदयरोग टाळण्यास मदत होते. ते खाल्ल्याने हाडे मजबूत होतात. दररोज सकाळी कच्चे केळे खाल्ल्याने रोगप्रतिकारक शक्ती मजबूत होते.
पिवळी केळी कोण खाऊ शकते?
जर तुम्हाला मधुमेह नसेल, तर तुम्ही पिवळी केळी खाऊ शकता. पिवळी किंवा पिकलेली केळी फायटोन्यूट्रिएंट्स आणि अँटीऑक्सिडंट्सने समृद्ध असतात, जी पेशींना नुकसान होण्यापासून वाचवतात. पिकलेल्या केळीच्या त्वचेवर तपकिरी डाग असतात, जे साखरेत रूपांतरित झालेल्या स्टार्चचे प्रमाण दर्शवते. केळीमध्ये जितके जास्त डाग असतील, तितकेच त्यात साखरेचे प्रमाण जास्त असते. फायबरव्यतिरिक्त डाग असलेल्या केळ्यांमध्ये सुक्रोज, फ्रुक्टोज व ग्लुकोज अशा तीन प्रकारची नैसर्गिक साखर असते. पिकलेल्या केळ्यांमध्ये ट्रिप्टोफॅनचे प्रमाण जास्त असते, जे सेरोटोनिनची पातळी वाढवते. ते व्हिटॅमिन बी६ ने समृद्ध असतात, जे महिलांमध्ये मासिक पाळीपूर्वीच्या सिंड्रोमची लक्षणे कमी करते.
