रोजची कंबरदुखी समजून दुर्लक्ष करताय? ‘हा’ बदल हलक्यात घेऊ नका, शरीरातील महत्त्वाचा अवयव हळू हळू निकामी होण्याचा संकेत…

याची लक्षणे काय असतात?

आरोग्यविषयक माहिती देणाऱ्या वेबसाइटच्या माहितीनुसार, किडनीच्या आजारात अनेकदा कंबरेच्या खालच्या भागात किंवा बरगड्यांच्या खाली वेदना होतात. या वेदना कधी कधी पोटाच्या बाजूला किंवा कंबरेभोवती पसरतात. सुरुवातीला वेदना हलक्या असतात, पण हळूहळू त्या पाठ, मांड्या आणि पोटापर्यंत जाऊ शकतात. जर सतत कंबरदुखीसोबत इतर लक्षणेही दिसत असतील, तर त्याकडे दुर्लक्ष करू नका.

लघवीतील बदल

किडनी खराब होण्याची सुरुवातीची लक्षणे म्हणजे वारंवार लघवी होणे. हे फक्त जास्त पाणी पिल्यामुळेच होत नाही, तर किडनी नीट काम न करत असल्यामुळेही होऊ शकते. लघवी करताना जळजळ किंवा वेदना होणे हेही गंभीर लक्षण आहे, जे किडनी किंवा मूत्रमार्गातील समस्येकडे इशारा करते. साधारणपणे लघवीचा रंग फिकट पिवळा असतो, पण पुरेसे पाणी पिऊनही रंग गडद किंवा धूसर राहिला, तर तपासणी करून घ्यावी. लघवीत रक्त दिसणे हे तर अजिबात दुर्लक्ष करू नये.

चेहरा किंवा डोळ्यांतूनही लक्षणे दिसतात का?

सकाळी उठल्यावर चेहरा किंवा डोळ्यांच्या खाली सूज दिसणे हे किडनीच्या बिघाडाचे लक्षण असू शकते. हे शरीरात पाणी साचल्यामुळे होते. जास्त काम न करता सतत थकवा जाणवणे, भूक न लागणे, वारंवार उलटी होणे किंवा मळमळ होणे ही किडनी फेल होण्याची लक्षणे असू शकतात. शरीरात घाणेरडे व विषारी पदार्थ साचल्यामुळे ऊर्जा कमी होते आणि कमजोरी वाटते. त्वचेला सतत खाज येणे किंवा श्वास घेण्यास त्रास होणे हीही गंभीर चिन्हे आहेत. शरीरात पाणी साचल्यामुळे दम लागतो, अगदी थोडे चालल्यावर किंवा बोलतानाही.

डॉक्टरांकडे कधी जावे?

यापैकी पाच किंवा त्यापेक्षा जास्त लक्षणे दिसत असतील, तर त्वरित डॉक्टरांशी संपर्क साधा. सुरुवातीच्या टप्प्यात वेळेवर ओळख आणि उपचार झाल्यास किडनीला होणारे गंभीर नुकसान टाळता येते. पुरेसे पाणी प्या, पण झोपण्याआधी जास्त द्रव पदार्थ घेणे टाळा. मीठ कमी वापरा, नियमित आरोग्य तपासणी करून घ्या आणि रक्तदाब व वजनावर लक्ष ठेवा. वेळेवर काळजी घेणे हेच किडनीच्या सुरक्षेचे सर्वात मोठे गमक आहे.