‘या’ आजारामुळे उंची होते कमी तर लिव्हरवर होतो थेट परिणाम! डोळ्यात दिसतात याची लक्षणे, दुर्लक्ष करणं पडेल महागात…

काय झाली होती समस्या

बीबीसी उर्दूच्या रिपोर्टनुसार, कॅरोलिन यांना सुरुवातीला डोळ्यांत विचित्र जळजळ आणि खाज सुटल्याची समस्या जाणवत होती. त्या डॉक्टरांकडे गेल्या तेव्हा त्यांना अजिबात कल्पना नव्हती की हे एका गंभीर लिव्हरच्या आजाराचं सुरुवातीचं लक्षण असू शकतं. नंतर त्यांनी सांगितलं की, आज मागे वळून पाहताना त्यांना अजूनही विश्वास बसत नाही की इतका मोठा आजार होऊनही त्या जिवंत आहेत. ‘रेअर डिजीज डे’च्या निमित्ताने त्यांनी लोकांना जागरूक करण्यासाठी आपल्या ग्रॅन्युलोमॅटस हेपेटायटीस या आजाराबद्दल सांगितलं. हा लिव्हरशी संबंधित अतिशय दुर्मीळ आजार आहे आणि डॉक्टरांना असे रुग्ण अनेकदा अनेक वर्षांत एक-दोनच वेळा दिसतात.

कशी होते यात समस्या

कॅरोलिन यांची समस्या २०१८ मध्ये सुरू झाली. त्या घरी टीव्ही पाहत होत्या तेव्हा अचानक त्यांना धूसर दिसायला लागलं आणि डोळ्यांत खाज सुटल्यासारखं वाटू लागलं. सुरुवातीला त्यांना ही साधी समस्या असेल असं वाटलं. पण, नंतर डोळ्यांच्या डॉक्टरांनी तपासणी केली तेव्हा डोळ्यात सूज असलेला आजार असल्याचं समोर आलं.

२०१९ मध्ये समस्या आणखी वाढली. त्यांच्या डोळ्यांचा आणि त्वचेचा रंग पिवळा पडू लागला. त्यानंतर डॉक्टरांनी लिव्हरची बायोप्सी करण्याचा सल्ला दिला. तपासणीमध्ये कळलं की त्यांना ग्रॅन्युलोमॅटस हेपेटायटीस नावाचा एक दुर्मीळ आजार आहे.

यात काय समस्या होते

आजार वाढत गेल्यावर त्यांची तब्येत खूपच कमजोर झाली. जास्त थकवा आणि मानसिक गोंधळ यामुळे त्यांना सामान्य आयुष्य जगणंही कठीण झालं आणि त्यांना व्हीलचेअरचा आधार घ्यावा लागला. डॉक्टरांनी त्यांना लिव्हर ट्रान्सप्लांट करण्याचा सल्ला दिला, त्यासाठी त्यांना सुमारे सहा महिने वाट पाहावी लागली.

या काळात औषधांच्या परिणामामुळे त्यांच्या पाठीच्या कण्याच्या हाडांमध्ये गंभीर ऑस्टिओपोरोसिस झाला. हा असा आजार आहे, ज्यात हाडे खूप कमजोर आणि ठिसूळ होतात. त्यामुळे त्यांच्या उंचीमध्येही मोठा बदल झाला. आधी त्यांची उंची सुमारे पाच फूट चार इंच होती, ती कमी होऊन सुमारे चार फूट सहा इंच झाली.

मात्र, लिव्हर ट्रान्सप्लांट आणि उपचारांनंतर त्यांच्या तब्येतीत हळूहळू सुधारणा झाली. काही वर्षांनी त्यांच्या डोळ्यांची आणि लिव्हरची कार्यक्षमता सुधारली आणि त्यांची उंचीही वाढून सुमारे पाच फुटापर्यंत पोहोचली.