मनी प्लांटची पानं पिवळी पडू लागलीत? कुंडीत टाका किचनमधली ‘ही’ एक पांढरी गोष्ट; काही दिवसांतच वेल दिसेल हिरवीगार

तज्ज्ञांच्या मते, मनी प्लांट खराब होण्यामागे अनेक कारणे असू शकतात. गरजेपेक्षा जास्त पाणी घालणे, कुंडीत पाणी साठून राहणे, पुरेसा प्रकाश न मिळणे, पोषक घटकांची कमतरता किंवा चुकीच्या ठिकाणी रोप ठेवणे यांमुळे त्याच्या वाढीवर दुष्परिणाम होतो. विशेषतः पावसाळ्यात ही समस्या अधिक जाणवते.

मनी प्लांटची पाने पिवळी पडू लागली, तर सर्वप्रथम त्याची योग्य रीत्या तपासणी करणे आवश्यक आहे. माती सतत ओली राहत असेल, तर काही दिवस पाणी देणे टाळावे. कुंडीत पाणी साठत नाही ना, याची खात्री करावी. तसेच रोपाला अप्रत्यक्षरीत्या सूर्यप्रकाश मिळेल अशा ठिकाणी ते ठेवले, तर त्याची अधिक चांगली वाढ होते.

त्याशिवाय झाडाची नियमित छाटणी करणेही तितकेच महत्त्वाचे आहे. सुकलेल्या फांद्या, पिवळी पडलेली पाने किंवा बुरशी लागलेले भाग त्वरित कापून टाकावेत. त्यामुळे रोपाची ऊर्जा चांगल्या फांद्यांच्या वाढीसाठी वापरली जाते. जर वेल खूप लांब झाली असेल आणि त्यावर तुरळक पाने दिसत असतील, तर तिची हलकीशी छाटणी करावी. त्यामुळे नवीन फुटवे येतात आणि रोप अधिक दाट दिसू लागते.

पावसाळ्यात कुंडीत पडलेली सुकी पाने किंवा कचरा वेळेवर काढून टाकणेही गरजेचे आहे; अन्यथा ओलसर वातावरणात बुरशी वाढण्याचा धोका निर्माण होतो. आठवड्यातून एकदा हलक्या पावसात दोन ते तीन तास रोप ठेवले, तर पानांवरील धूळ निघून जाते आणि नैसर्गिक ओलाव्यामुळे रोप ताजेतवाने होते; मात्र रोप बाहेर मुसळधार पावसात अनेक दिवस सलगपणे ठेवू नये. त्यामुळे मुळे सडण्याचा धोका वाढू शकतो.

अनेकांना प्रश्न पडतो की, मनी प्लांटची वाढ झपाट्याने होण्यासाठी घरच्या घरी काय करता येईल? त्यासाठी बाजारातील महागडी उत्पादने वापरण्याची गरज नाही. आपल्या स्वयंपाकघरात सहज उपलब्ध होणारा एक साधा पदार्थ या रोपासाठी नैसर्गिक पोषणद्रव्यांचे काम करू शकतो.

हा पदार्थ रोपाला आवश्यक असलेले काही महत्त्वाचे घटक पुरवण्यास मदत करतो. त्यामुळे पानांचा तजेला टिकून राहतो, वाढ सुधारते आणि पानांचा पिवळेपणा कमी होण्यास मदत मिळू शकते. अर्थात, त्याचाही वापर योग्य प्रमाणात आणि योग्य पद्धतीने करणे आवश्यक आहे.

मग नेमका कोणता पदार्थ वापरायचा?

त्यासाठी तांदूळ धुतल्यानंतर उरलेले पाणी उपयोगी ठरू शकते. या पाण्यात स्टार्चसह पोटॅशियम, फॉस्फरस आणि इतर काही पोषक घटक असतात. महिन्यातून दोन ते तीन वेळा, मीठ नसलेले ताजे तांदळाचे पाणी योग्य प्रमाणात मनी प्लांटच्या कुंडीत घातल्यास त्याच्या वाढीस चालना मिळू शकते. तसेच पाने पिवळी पडणे, दुर्गंधी येणे आणि काही प्रमाणात बुरशीची समस्या कमी होण्यासही मदत मिळू शकते.

अर्थात, कोणताही घरगुती उपाय करताना अतिरेक टाळणे महत्त्वाचे आहे. योग्य प्रमाणात पाणी, पुरेसा प्रकाश, नियमित छाटणी आणि संतुलित निगा यांसोबत हा उपाय केल्यास मनी प्लांट पुन्हा हिरवागार आणि तजेलदार दिसण्यास मदत मिळू शकते.