पोट साफ होत नाहीये? जाणून घ्या इंडियन की वेस्टर्न, कोणते टॉयलेट तुमच्या आरोग्यासाठी योग्य

त्यामुळे दोघांचेही फायदे आणि तोटे समजून घेणे गरजेचे आहे. कारण प्रत्येक व्यक्तीसाठी एकच पर्याय योग्य असू शकत नाही. वय, गुडघे आणि सांध्यांचा त्रास, शारीरिक क्षमता आणि बद्धकोष्ठतेची (constipation) समस्या लक्षात घेऊनच टॉयलेटची निवड केली पाहिजे.

इंडियन टॉयलेटचा आरोग्यावर काय परिणाम होतो?

इंडियन टॉयलेट वापरताना व्यक्ती स्क्वाटिंग पोझिशनमध्ये बसते. या स्थितीत मांड्या आणि गुडघे छातीच्या जवळ येतात आणि शरीर पुढे झुकते. असे मानले जाते की, या पोझिशनमुळे पोट सहज साफ होण्यास मदत होते आणि मलाशयावर अतिरिक्त ताण येत नाही.

मात्र, याचा अर्थ असा नाही की इंडियन टॉयलेट प्रत्येकासाठीच उत्तम आहे. ज्या लोकांना गुडघेदुखी, संधिवात (आर्थरायटिस), कंबरदुखी किंवा शरीराचा समतोल राखण्यात अडचण येते, त्यांच्यासाठी जास्त वेळ स्क्वाटिंग पोझिशनमध्ये बसणे कठीण आणि त्रासदायक ठरू शकते.

वेस्टर्न टॉयलेट कधी फायदेशीर ठरते?

वेस्टर्न टॉयलेटमध्ये व्यक्ती खुर्चीसारखी सीटवर बसते. त्यामुळे खाली बसण्यासाठी आणि उठण्यासाठी खूप कमी मेहनत लागते. याच कारणामुळे ज्येष्ठ नागरिक आणि ज्यांना गुडघे, कंबर किंवा पायांचे आजार आहेत, त्यांच्यासाठी वेस्टर्न टॉयलेट अधिक सोयीचे मानले जाते.

पण वेस्टर्न टॉयलेट वापरताना बसण्याची पद्धत योग्य असणे गरजेचे आहे. टॉयलेट सीटवर बसून जास्त वेळ मोबाईल वापरणे किंवा तासनतास बसून राहणे ही चुकीची सवय आहे. यामुळे आरोग्याच्या इतर समस्या उद्भवू शकतात.

बद्धकोष्ठतेच्या (Constipation) समस्येत कोणते टॉयलेट चांगले?

बद्धकोष्ठतेची समस्या फक्त टॉयलेट बदलल्याने पूर्णपणे बरी होत नाही. त्यासाठी भरपूर पाणी पिणे, फायबरयुक्त आहार घेणे, नियमित व्यायाम करणे आणि योग्य वेळ पाळणे जास्त महत्त्वाचे आहे. वेस्टर्न टॉयलेट वापरणाऱ्या व्यक्ती आपल्या पायांखाली लहान स्टूल (Footstool) ठेवून बसू शकतात. यामुळे पाय थोडे वर येतात आणि इंडियन टॉयलेटसारखीच पोझिशन मिळते, ज्यामुळे पोट साफ होण्यास मदत होते.

स्वच्छतेच्या बाबतीत कोणते टॉयलेट उत्तम?

स्वच्छतेच्या दृष्टीने फक्त टॉयलेटची डिझाइन महत्त्वाची नसते, तर नियमित सफाई जास्त महत्त्वाची असते. इंडियन आणि वेस्टर्न दोन्ही टॉयलेट वेळेवर साफ केले नाही तर जंतू आणि बॅक्टेरिया पसरू शकतात.

मग इंडियन की वेस्टर्न, कोणते टॉयलेट निवडावे?

जर एखादी निरोगी व्यक्ती सहज स्क्वाटिंग पोझिशनमध्ये बसू शकत असेल, तर तिच्यासाठी इंडियन टॉयलेट उत्तम पर्याय आहे. दुसरीकडे, वृद्ध व्यक्ती किंवा गुडघे-कंबरदुखीचा त्रास असलेल्यांसाठी वेस्टर्न टॉयलेट अधिक आरामदायक आहे.

(टीप- वरील बातमी प्राप्त माहितीवर आधारित आहे, लोकसत्ता डॉट.कॉम याची पुष्टी करत नाही.)