नितीन गडकरींनी १३५ वरून ८९ किलोपर्यंत वजन कमी करताना ‘हे’ काम नेटाने केले

Nitin Gadkari’s Fitness Secret: वजन कमी करणं सोपं नाही, पण गडकरींचा प्रवास वेगळाच ठरतो. १३५ ते ८९ किलोपर्यंतचा हा बदल कोणत्या पथ्यामुळे शक्य झाला?

Nitin Gadkari reveals secret behind his weight loss transformation after Covid

नितीन गडकरींचा फिटनेस प्रवास (फोटो: नितीन गडकरी/ YouTube)

Nitin Gadkari’s Post-Covid Weight Loss Journey Revealed: वजन कमी करण्याच्या गोष्टी ऐकल्या की, डोळ्यांसमोर येतात कठोर डाएट, झटपट उपाय किंवा आधी व नंतरचे फोटो. मात्र, केंद्रीय मंत्री नितीन गडकरी यांच्या वजनकपातीची कहाणी या सगळ्यांपेक्षा वेगळी आणि विचार करायला लावणारी आहे. ही कहाणी आहे शिस्त, सातत्य आणि आयुष्याकडे पाहण्याचा दृष्टिकोन बदलणाऱ्या एका निर्णायक क्षणाची.

अलीकडेच प्रसिद्ध कोरिओग्राफर व दिग्दर्शिका फराह खान यांच्या यूट्यूब चॅनेलवर आलेल्या एका व्हिडीओमध्ये गडकरी यांनी आपल्या आयुष्यातील हा मोठा बदल उघडपणे सांगितला. फराह खान आणि त्यांचे स्वयंपाकी दिलीप यांनी गडकरी यांच्या घरी भेट दिली असताना, त्यांच्या दैनंदिन जीवनशैलीबाबत झालेल्या संवादात हे रहस्य समोर आले.

“सध्या रात्री साडेनऊ वाजले आहेत. तुमच्याशी भेट झाल्यानंतरही माझ्या बैठका रात्री १ वाजेपर्यंत असतात. त्यानंतर सकाळी ७ वाजता उठून मी अडीच तास व्यायाम करतो,” असे गडकरी म्हणाले. पुढे ते सांगतात, “एक काळ असा होता की, माझे वजन १३५ किलो होते. आज माझे वजन ८९ किलो आहे. या नियमित दिनचर्येचा सकारात्मक परिणाम माझ्या चेहऱ्यावरही दिसतो.”

हा बदल अचानक झालेला नव्हता. याआधी ANI या वृत्तसंस्थेला दिलेल्या पॉडकास्टमध्ये गडकरी यांनी उघड केले होते की, कोविडनंतर त्यांनी तब्बल ४६ किलो वजन कमी केले होते. मात्र त्यांच्या मते, हा बदल केवळ सौंदर्यासाठी नव्हता; तो आयुष्याच्या अस्तित्वाशी निगडित होता.

“माझे आयुष्य पूर्णपणे अव्यवस्थित होते. शिस्त? अजिबात नव्हती,” असे ते स्पष्ट शब्दांत सांगतात. कामाच्या व्यापात स्वतःच्या आरोग्याकडे पूर्णपणे दुर्लक्ष झाल्याची कबुलीही त्यांनी दिली; पण कोविड काळात घडलेल्या काही दुःखद घटनांनी त्यांना आतून हादरवले.

हेही वाचा

पोटातील घाण कशी साफ कराल? बाबा रामदेवांनी सांगितला सोपा उपाय; सकाळी ‘हे’ खाल्लंत तर पोट लगेच होईल मोकळं!

“कोविडमध्ये माझ्यासोबत असलेले अनेक मित्र गेले. तेव्हा मला जाणवले की, आता बदल करायलाच हवा,” असे सांगताना त्यांच्या शब्दांत गंभीरता होती. हाच तो क्षण होता, ज्याने त्यांच्या आयुष्याची दिशा कायमची बदलली.

आज गडकरी यांच्यासाठी व्यायाम हा पर्याय नाही, तर ती अनिवार्य गरज आहे. ते दररोज प्राणायाम, ताणतणाव कमी करणारे व्यायाम, स्नायू बळकट करणारे प्रकार करतात. प्रशिक्षित तज्ज्ञांच्या मार्गदर्शनाखाली ही सगळी प्रक्रिया सुरू असल्याचेही त्यांनी सांगितले.

या संदर्भात फिटनेस आणि जीवनशैली सल्लागार साधना सिंग सांगतात की, सर्वसामान्य नोकरदार व्यक्तीसाठी दररोज अडीच तास व्यायाम करणे शक्य नसेल. मात्र, गडकरी यांच्या यशामागे वेळेची लांबी नाही, तर नियमितता व शिस्त आहे. त्या म्हणतात, “४५ ते ६० मिनिटांचा नियोजनबद्ध व्यायामही पुरेसा ठरू शकतो, जर तो रोज केला गेला तर.”

गडकरी यांच्या आयुष्यातील बदलाने मिळणारा संदेश आरोग्य हेच खरे धन आहे. जेव्हा शरीर साथ देत नाही, तेव्हा पद, प्रतिष्ठा किंवा यशाला अर्थ उरत नाही. ही केवळ वजन कमी करण्याची गोष्ट नाही, तर स्वतःकडे पुन्हा एकदा पाहण्याची आणि आयुष्य नव्याने घडवण्याची प्रेरणादायी कहाणी आहे.