Peeing After Water: समजा तुम्ही ऑफिसमध्ये आहात किंवा एखाद्या महत्त्वाच्या कामात गुंतलेले आहात. अशा वेळी तुम्ही अर्धा किंवा एक ग्लास पाणी प्यायलात आणि १५ मिनिटांच्या आतच तुम्हाला लगेच टॉयलेटला जावं लागलं. एकदा दोनदा असं झालं तर ठीक आहे, पण जर हे वारंवार होत असेल तर मनात प्रश्न येणं साहजिक आहे की असं का होतंय?
जर तुमच्याबरोबरही असं होत असेल तर घाबरू नका. चला तर मग, या समस्येवर कशाप्रकारे मात करायचं आणि तज्ज्ञ याबद्दल काय सांगतात, ते जाणून घेऊया.
यामागची कारणं काय असू शकतात?
देवघर येथील मधुमेह क्लिनिकमधील युरोलॉजिस्ट डॉ. प्रभात कुमार यांच्या मते, वारंवार लघवी होण्याचं एक सामान्य कारण म्हणजे ओव्हरॲक्टिव्ह ब्लॅडर असू शकतं. यात मूत्राशयाच्या स्नायू गरजेपेक्षा जास्त आकुंचन पावतात. त्यामुळे ब्लॅडर पूर्ण भरलेला नसतानाही लगेच लघवी होतो.
याशिवाय, लघवीचा संसर्ग, चहा-कॉफी किंवा दारूमुळे होणारी जळजळ, नियंत्रणात नसलेली साखर, तणावामुळे ब्लॅडर जास्त संवेदनशील होणं, किंवा कमी वेळात खूप जास्त पाणी पिणं हीसुद्धा कारणं असू शकतात.
जेव्हा एखादी व्यक्ती एकदम खूप पाणी पिते, तेव्हा मूत्रपिंड जास्त पाणी पटकन गाळायला लागतात. त्यामुळे लघवी वारंवार येते. दिवसभर थोड्या-थोड्या वेळाने पाणी प्यायल्यास ही समस्या बऱ्याचदा कमी होते.
धोक्याचा संकेत कधी असू शकतं?
जर वारंवार लघवी होण्यासोबत जळजळ, वेदना, लघवीत रक्त येणं, खालच्या पोटात दुखणं, ताप येणं, अचानक जोरात लघवी लागणं किंवा रात्री वारंवार उठून टॉयलेटला जावं लागत असेल, तर ताबडतोब डॉक्टरांशी संपर्क साधावा.
ही लक्षणं लघवीचा संसर्ग, मूत्राशयाची सूज, पुरुषांमध्ये प्रोस्टेटची समस्या किंवा मधुमेहासारख्या चयापचयाच्या आजारांकडे इशारा करू शकतात. तसंच, वय वाढल्यावर ब्लॅडरची ताकद आणि नियंत्रण कमी होऊ शकतं. तसेच तणाव आणि चिंता यामुळेही ब्लॅडर जास्त संवेदनशील होतो, त्यामुळे कमी लघवी तयार झाली तरीही वारंवार लघवी लागते.
आराम मिळण्यासाठी काय करावं?
सर्वात आधी तुम्ही किती आणि किती वेगाने पाणी पिता, याकडे लक्ष द्या. चहा, कॉफी आणि कोल्ड ड्रिंकसारखी मूत्राशयाला त्रास देणारी पेय कमी करा. ठराविक वेळेला लघवीला जाण्याची सवय लावा आणि “नंतर गरज लागेल” म्हणून वारंवार टॉयलेटला जाणं टाळा. तसंच, पेल्विक फ्लोअरचे व्यायाम केल्यास ब्लॅडरवरचं नियंत्रण सुधारायला मदत होते.
