गरोदरपणात सेक्स करणे योग्य की अयोग्य? बाळावर काय परिणाम होतो? जाणून घ्या डॉक्टरांकडून योग्य माहिती

“गर्भधारणेदरम्यान शारीरिक संबंध ठेवणे सुरक्षित आहे का?” यावर अरिहंत हॉस्पिटल आणि टेस्ट ट्यूब बेबी येथील स्त्रीरोगतज्ज्ञ डॉ. सरिता जैन एका व्हिडीओमध्ये म्हणतात की, बहुतेक प्रकरणांमध्ये, शारीरिक संबंध पूर्णपणे सुरक्षित असतात. त्यात कोणतेही नुकसान नाही. महिला जोडीदाराला पहिल्या तिमाहीत मळमळ, उलट्या व चक्कर येणे यांसारख्या त्रासांना सामोरे जावे लागू शकते. त्यामुळे त्यांना अस्वस्थता येते. तथापि, दुसऱ्या तिमाहीत या समस्या मोठ्या प्रमाणात कमी होतात. या तिमाहीत गर्भाशय तितकेसे मोठे नसते, त्यामुळे महिलांना अधिक आरामदायी वाटते. डॉ. जैन म्हणतात की, तिसऱ्या तिमाहीत डोकेदुखी, मळमळ व उलट्या या गोष्टी पुन्हा होऊ शकतात, जे महिलांसाठी त्रासदायक असू शकते.

डॉ. जैन म्हणतात की, गर्भधारणेदरम्यान शारीरिक संपर्काबद्दल अनेक गैरसमज आहेत. एक समज असा आहे की, गर्भधारणेदरम्यान जोडप्याच्या शारीरिक संपर्कामुळे बाळाला हानी पोहोचू शकते; तथापि हे अजिबात खरे नाही. बाळ गर्भाशयात अत्यंत सुरक्षित असते. आणखी एक समज असा आहे की, पहिल्या तिमाहीत शारीरिक संपर्क साधू नये. तथापि, ज्या महिलांच्या गर्भधारणेत कोणतीही गुंतागुंत किंवा जोखीम घटक नसतात, त्या शारीरिक संबंध ठेवू शकतात.

गर्भधारणेदरम्यान सेक्स करताना कोणती काळजी घेणे आवश्यक?

मुंबईतील प्रसिद्ध स्त्रीरोगतज्ज्ञ डॉ. मुकेश गुप्ता एका व्हिडीओमध्ये म्हणतात की, गर्भधारणेदरम्यान सेक्स करणे शक्य आहे. तथापि, सुरक्षित सेक्स अत्यंत महत्त्वाचा आहे. उदाहरणार्थ- सेक्स करताना पोझिशनिंगचा विचार करा. पुरुष जोडीदारांनी त्यांचे वजन त्यांच्या जोडीदारावर टाकले जाणार नाही याची काळजी घ्यावी. कारण- त्यामुळे दुखापत होऊ शकते. त्याचप्रमाणे संसर्गाचाही धोका असतो. म्हणून संरक्षण आवश्यक आहे.

‘या’ ५ परिस्थितींमध्ये शारीरिक संबंध टाळणे हिताचे

• मागील गर्भधारणेदरम्यान गर्भपात झाला होता.
• मागील प्रसूती अकाली झाली होती
• सध्याच्या गरोदरपणात जुळी मुले किंवा त्याहून अधिक मुले आहेत.
• सध्याच्या गरोदरपणात गर्भाशय ग्रीवा अरुंद किंवा आकुंचन पावली आहे.
• वारंवार रक्तस्राव होत आहे.