आर. माधवनचे आजी-आजोबा ९२-९३ वर्षांपर्यंत जगले; रोज ३ वेळा खात होते फक्त ‘हा’ पदार्थ; केसही शेवटपर्यंत काळे, तब्येतही तंदुरुस्त

आजच्या काळात वजन कमी करण्यासाठी, फिट राहण्यासाठी किंवा दीर्घायुष्यासाठी विविध प्रकारचे डाएट प्लॅन, महागडी सप्लिमेंट्स आणि खास आहारपद्धतींचा सल्ला दिला जातो. मात्र, माधवनच्या आजी-आजोबांनी यापैकी काहीही केले नव्हते. उलट त्यांनी आयुष्यभर अगदी साधा, घरगुती आणि पारंपरिक भारतीय आहार घेतला.

२०२४ मध्ये ‘100 Year Life Project’ या पॉडकास्टमध्ये बोलताना माधवनने त्यांच्या रोजच्या जेवणाविषयी सविस्तर माहिती दिली. त्याने सांगितले की सकाळी इडली-सांबार आणि रसम पोंगल, दुपारी भात आणि रात्री पुन्हा भातासोबत भाजी असा त्यांचा नियमित आहार होता. विशेष म्हणजे हा आहार वर्षानुवर्षे जवळपास तसाच राहिला.

आज अनेक लोक भात खाणे टाळतात. वजन वाढेल किंवा आरोग्यावर परिणाम होईल, अशी भीती अनेकांच्या मनात असते. पण, माधवनने सांगितलेली गोष्ट ऐकल्यानंतर अनेकांना आश्चर्य वाटले. कारण त्याचे आजी-आजोबा दिवसातून तब्बल तीन वेळा भात खात होते आणि तरीही त्यांनी नव्वदीपलीकडे निरोगी आयुष्य जगले.

माधवनने आणखी एक रंजक गोष्ट सांगितली. त्याच्या आजोबांचे केस शेवटपर्यंत नैसर्गिकरीत्या काळे होते. वाढत्या वयातही त्यांना अनेक गंभीर आरोग्य समस्या नव्हत्या, त्यामुळे त्यांच्या साध्या जीवनशैलीकडे आणि आहाराकडे लोकांचे विशेष लक्ष वेधले जात आहे.

याच पॉडकास्टमध्ये माधवनने स्पष्ट केले की, आजच्या फिटनेस जगतात ज्या सप्लिमेंट्सची मोठ्या प्रमाणात चर्चा होते, त्यांचा वापर त्याच्या आजी-आजोबांनी कधीच केला नाही. त्यांचे आयुष्य घरगुती अन्न, नियमित दिनचर्या आणि साधेपणात गेले.

माधवन स्वतःही शक्य तितका हा वारसा जपण्याचा प्रयत्न करतो. जीक्यूला दिलेल्या मुलाखतीत तो म्हणाला, “मी शूटिंगसाठी बाहेर गेलो तरी माझ्यासोबत शेफ असतो. तो माझ्या आईने बनवायची तशी साधी डाळ, भाजी आणि भात तयार करतो.”

भाताबाबत निर्माण झालेल्या गैरसमजांवर भाष्य करताना तो पुढे म्हणाला, “भाताबद्दल एवढी भीती का निर्माण केली जाते हे मला समजत नाही. माझे आजी-आजोबा ९२ आणि ९३ वर्षांपर्यंत जगले आणि ते दिवसातून तीन वेळा भात खात होते.”

माधवनच्या या वक्तव्यामुळे पारंपरिक भारतीय आहाराबद्दल पुन्हा एकदा चर्चा सुरू झाली आहे. अनेक तज्ज्ञांच्या मते, केवळ एखादा पदार्थ चांगला किंवा वाईट असतो असे नाही, तर तो किती प्रमाणात, कोणत्या पद्धतीने आणि कोणत्या जीवनशैलीसोबत घेतला जातो हे अधिक महत्त्वाचे असते.

दरम्यान, कामाच्या आघाडीवरही माधवनची घोडदौड सुरू आहे. तो नुकताच आदित्य धर दिग्दर्शित ‘धुरंधर: द रिव्हेंज’ या चित्रपटात झळकला होता. रणवीर सिंह प्रमुख भूमिकेत असलेल्या या चित्रपटाने जगभरात तब्बल १८०० कोटी रुपयांहून अधिक कमाई केल्याचे सांगितले जात आहे. हा चित्रपट १९ मार्च २०२६ रोजी प्रदर्शित झाला होता.

याशिवाय माधवनकडे ‘अल्फा’, ‘दही चिनी’ आणि ‘तनू वेड्स मनू ३’ यांसारखे महत्त्वाचे चित्रपटही आहेत. मात्र सध्या त्याच्या चित्रपटांपेक्षा त्याने सांगितलेले आजी-आजोबांच्या दीर्घायुष्याचे रहस्यच सर्वाधिक चर्चेचा विषय ठरत आहे.

साधा भात, घरगुती भाजी, डाळ आणि नियमित जीवनशैली… खरंच दीर्घ आणि निरोगी आयुष्याचे रहस्य इतके सोपे असू शकते का? माधवनच्या या अनुभवामुळे अनेकजण पुन्हा एकदा आपल्या पारंपरिक आहाराकडे नव्या नजरेने पाहू लागले आहेत.