५६व्या वर्षीही राहुल गांधी इतके फिट कसे? वजन नियंत्रित ठेवण्यासाठी करतात ‘या’ ३ गोष्टी; Gen Z ला सांगितली ‘ही’ साधी ट्रिक

राहुल गांधी यांनी सोशल मीडियावर विद्यार्थ्यांना आणि जेन झी पिढीतील तरुणांना त्यांच्या वैयक्तिक आयुष्यापासून आवडी-निवडी आणि अनुभवांपर्यंत विविध प्रश्न विचारण्याचे आवाहन केले होते. या प्रश्नोत्तरांच्या सत्रात एका व्यक्तीने त्यांच्या फिटनेसच्या दिनक्रमाबद्दल प्रश्न विचारला. त्यावर राहुल गांधी यांनी तंदुरुस्तीमागे एखादा ठराविक व्यायाम प्रकार नसून सातत्य अधिक महत्त्वाचे असल्याचे स्पष्ट केले.

फिटनेससाठी नेमकं काय करतात राहुल गांधी?

राहुल गांधी यांच्या मते, तंदुरुस्त राहण्यासाठी कोणती विशिष्ट व्यायामपद्धत निवडली आहे, यापेक्षा ती सातत्याने करणे महत्त्वाचे आहे. एखादी गोष्ट अधूनमधून करण्यापेक्षा नियमितपणे आणि सातत्याने केल्यास त्याचा फायदा अधिक होतो असे त्यांनी सांगितले.

त्यांच्या स्वतःच्या दिनक्रमाबद्दल सांगताना राहुल गांधी यांनी मार्शल आर्ट्स, पोहणे आणि धावणे या विविध शारीरिक व्यायामांचा समावेश असल्याचे सांगितले. यासोबतच योगालाही त्यांनी आपल्या दिनक्रमात महत्त्वाचे स्थान दिले आहे, त्यामुळे त्यांचा व्यायाम केवळ एका प्रकारापुरता मर्यादित नसून शरीराच्या विविध गरजा लक्षात घेऊन वेगवेगळ्या प्रकारच्या हालचालींवर भर दिला जातो.

व्यस्त वेळापत्रकातही व्यायामासाठी वेळ

राहुल गांधी यांचे वेळापत्रक अनेकदा व्यस्त असते. मात्र, कामामुळे व्यायामाकडे दुर्लक्ष करण्याऐवजी ते त्यासाठी स्वतंत्रपणे वेळ काढतात. शारीरिक तंदुरुस्तीसाठी ते साधारण एक तास देत असल्याचे त्यांनी सांगितले.

या वेळेत शरीराची ताकद वाढवणे, श्वसन क्षमता आणि लवचिकता सुधारण्यावर भर दिला जातो. व्यायाम हा मोकळा वेळ मिळाल्यावर करायचा प्रकार नसून, तो आपल्या दिनचर्येचा भाग असायला हवा, असा त्यांचा दृष्टिकोन आहे.

आपले वेळापत्रक कितीही व्यस्त असले तरी व्यायामासाठी वेळ काढण्याचा प्रयत्न करत असल्याचे राहुल गांधी यांनी सांगितले. अगदी रात्री उशिरा वेळ मिळाला तरी त्या वेळी व्यायाम करण्यास ते प्राधान्य देतात. त्यांच्या मते, तंदुरुस्तीच्या बाबतीत नियमितपणा आणि सातत्याला सर्वाधिक महत्त्व आहे.

जेन झी पिढीला राहुल गांधींचा फिटनेस मंत्र

तरुणांनी तंदुरुस्त राहण्यासाठी केवळ व्यायामावर अवलंबून राहू नये, असेही राहुल गांधी यांनी स्पष्ट केले. नियमित शारीरिक हालचालींसोबत आहाराकडेही लक्ष देणे आवश्यक असल्याचे त्यांनी सांगितले.

स्वच्छ आणि संतुलित आहार घेण्यावर भर देण्याचा सल्ला त्यांनी तरुणांना दिला. सतत काही ना काही खात राहण्याची सवय टाळणे आणि मद्यपानाचे प्रमाण मर्यादित ठेवणे गरजेचे असल्याचेही त्यांनी सांगितले.

त्यांच्या मते, व्यायाम आणि आहार या दोन्ही गोष्टींचा समतोल राखणे आवश्यक आहे. केवळ व्यायाम करून आरोग्यदायी जीवनशैली साध्य होत नाही. त्यासाठी नियमित व्यायाम, योग्य आहार आणि शिस्तबद्ध दिनचर्या या गोष्टी एकत्र असणे गरजेचे आहे.

राहुल गांधी यांनी फिटनेसचा कोणताही कठीण किंवा अतिशय तीव्र व्यायामक्रम सांगितलेला नाही. उलट, आपल्या दिनचर्येत व्यायामासाठी वेळ काढणे, सातत्य राखणे आणि आहाराच्या सवयींकडे लक्ष देणे, यालाच त्यांनी महत्त्व दिले. त्यांचा हा साधा दृष्टिकोन सध्या चर्चेचा विषय ठरत आहे.