Side effects of applying Kajal: काजळ हा १६ श्रृंगारातील महत्त्वाचा भाग आहे. काजळ लावणे हा महिलांच्या मेकअपमधील सर्वात महत्त्वाचा भाग असतो. काजळ लावल्याने डोळ्याचे सौंदर्य खुलून येते आणि डोळे जास्त उठावदार दिसत असल्याने तरुणींपासून ते वयोवृद्ध महिलांपर्यंत सगळ्यांचीच याला पसंती असल्याचे दिसते. डोळ्यांना कोणतीही गोष्ट लावताना त्याची विशेष काळजी घ्यावी लागते. डोळ्याचे काजळ पसरत असल्याने अनेक मुली हैराण झालेल्या दिसतात, यामुळे काजळ लावल्यानंतर थोड्या वेळाने डोळ्याखाली काळे डाग दिसतात, पण तुम्हाला माहीत आहे का की दररोज काजळ लावणे तुमच्या डोळ्यांसाठी हानिकारक ठरू शकते? जर तुम्ही विचार न करता दररोज काजळ वापरले, तर त्याचा तुमच्या डोळ्यांच्या आरोग्यावर परिणाम होऊ शकतो.

काजळ लावण्याचे दुष्परिणाम

  • काजळ लावण्याचे अनेक फायदे आहेत, परंतु रासायनिक घटक असलेली उत्पादने वापरल्याने तुमच्या समस्या वाढू शकतात. काजळ लावल्यानंतर तुमचे डोळे लाल होत असतील किंवा त्यातून पाणी येत असेल तर ते ॲलर्जीचे लक्षण असू शकते.
  • दररोज काजळ लावल्याने तुमच्या डोळ्यांमध्ये जीवाणूंचा प्रवेश होऊ शकतो, विशेषतः जर तुम्ही जुने किंवा मुदत संपलेले काजळ वापरत असाल. यामुळे डोळ्यांचे संक्रमण, जसे की नेत्रश्लेष्मशोथ (conjunctivitis) होऊ शकते.
  • काजळ लावल्याने डोळ्यांतील नैसर्गिक ओलावा कमी होतो, यामुळे डोळे कोरडे पडू शकतात, जळजळ होऊ शकते किंवा जड वाटू शकते, म्हणून नेहमी चांगल्या दर्जाचे काजळ वापरणे उत्तम.
  • काजळामुळे दृष्टीवर परिणाम होऊ शकतो. डोळ्यांच्या आत वारंवार लावल्यास, त्याचा डोळ्यांच्या आतील आवरणावर परिणाम होऊन दृष्टी धूसर होऊ शकते.
  • काजळ अनेकदा पसरते, ज्यामुळे डोळ्यांखाली काळी वर्तुळे दिसू लागतात. जर हे दीर्घकाळ असेच राहिले तर त्यामुळे खरी काळी वर्तुळे आणखी गडद होऊ शकतात.
  • काजळ जर तुम्ही घरी बनवत असाल तर तुम्ही ते दररोज नक्कीच वापरू शकता, हातांची स्वच्छता न करता जर तुम्ही काजळ घालत असाल तर फायद्यांपेक्षा त्याचे तोटेच जास्त दिसून येतील. डोळ्याला जखम होणे, डोळ्यांत जळजळ निर्माण होणे आणि या जखमेमध्ये इन्फेक्शन होणे हे अतिशय धोकादायक, नजरेवर अपाय करणारे आणि अंधत्वाकडे नेणारे परिणाम असू शकतात.

घरगुती काजळ वापरू शकता

काजळाच्या प्रकारामध्ये सुरमा हा एक प्रकार आहे. सुरमामध्ये वेगवेगळ्या औषधी आणि वनस्पती वापरल्या जातात. पूर्वी आयुर्वेद पद्धतीनं नेत्रोपचार व्हायचे, त्यावेळी अंजन म्हणून त्याचा वापर केला जायचा, त्यामुळे काजळ हे एक प्रकारे अंजनच आहे आणि त्याचा निश्चितपणे फायदा होऊ शकतो. औषधी वनस्पती आणि काटेकोरपणे काजळ तयार केले असेल तर त्याचा फायदा दिसून येईल.

घरगुती काजळ बनवण्याची पद्धत

साहित्य:

  • तूप (शुद्ध देशी तूप)
  • कापसाची वात
  • एक लहान दिवा (दीप)
  • स्टील/पितळची प्लेट (ताटली)
  • एरंडेल तेल – १-२ थेंब

कसे बनवायचे:

  • कापसाची वात तुपात भिजवून दिवा लावा.
  • जळत्या दिव्याच्या वर (थोड्या अंतरावर) स्टीलची प्लेट उलटी धरून ठेवा.
    (धूर प्लेटवर जमा होईल)
  • १०–१५ मिनिटांत प्लेटवर काळा सॉफ्ट थर जमा होईल.
  • हा काळा थर हळूच काढून एका डबीत जमा करा.
  • त्यात १-२ थेंब एरंडेल तेल किंवा तूप घालून मऊ पेस्ट बनवा आणि दररोज डोळ्यांना लावा, हे काजळ तुम्ही लहान मुलांनादेखील लावू शकता.