माधुरी दीक्षितचा नवरा म्हणतो, “त्रास देण्याआधीच…”, जीवघेण्या उष्णतेपासून वाचण्यासाठी डॉ. नेने यांनी सांगितला जबरदस्त उपाय

“उन्हाळा तुम्हाला त्रास देण्याआधीच त्यावर नियंत्रण मिळवा,” असे डॉ. नेने यांनी त्यांच्या इन्स्टाग्राम पोस्टच्या कॅप्शनमध्ये म्हटले आहे. सध्याची परिस्थिती ही एक इशारा असल्याचे त्यांनी सांगितले. डिहायड्रेशन आणि थकव्यामुळे शेकडो लोकांवर उपचार सुरू आहेत. पण योग्य काळजी घेतली तर हे टाळता येऊ शकते.

“तुमच्या शरीराला काय हवे आहे याचे संकेत शरीर आधीच देत असते, फक्त ते ओळखायला शिकले पाहिजे. पाणी पिण्याच्या सवयींपासून योग्य उन्हाळी आहारापर्यंत आम्ही संपूर्ण मार्गदर्शन दिले आहे, जे तुम्हाला या सर्वात गरम वर्षात सुरक्षित राहण्यास मदत करेल,” असेही त्यांनी सांगितले.

इन्स्टाग्रामवर त्यांनी दिलेल्या टिप्समध्ये ते म्हणाले, “तुम्हाला तहान लागली म्हणजे शरीराला आधीच पाण्याची कमतरता जाणवू लागलेली असते. सनस्क्रीन, पुरेसे पाणी पिणे आणि योग्य आहार हे उष्णतेपासून बचावाचे महत्त्वाचे आधार आहेत. दररोज ३ ते ४ लिटर पाणी पिण्यावर विशेष भर द्या.”

उष्णतेपासून बचावासाठी तज्ज्ञांच्या टिप्स (Madhuri Dixit Husband Dr. Shriram Nene)

डॉ. बसवराज कुम्बार, ॲस्टर व्हाईटफिल्ड हॉस्पिटल, बेंगळुरू येथील अंतर्गत औषधतज्ज्ञ, यांनीही याला सहमती दर्शवली. त्यांनी सांगितले की दररोज ८ ते १० ग्लास पाणी प्या, नेहमी पाण्याची बाटली सोबत ठेवा आणि पाण्यात लिंबू, काकडी किंवा पुदिना घालून ते अधिक ताजेतवाने बनवा. सकाळची सुरुवात एका ग्लास पाण्याने केल्यास शरीरातील पाण्याचे प्रमाण आणि मेटाबॉलिझम सुधारते.

“कॉफी, एनर्जी ड्रिंक्स आणि सॉफ्ट ड्रिंक्सचे सेवन कमी करा. त्याऐवजी नारळपाणी, हर्बल चहा किंवा लिंबूपाणी प्या. जास्त कॅफिन आणि साखर शरीरात पाण्याची कमतरता, थकवा आणि पोट फुगणे यास कारणीभूत ठरू शकते,” असे त्यांनी सांगितले.

डॉ. बसवराज यांनी पुढे सांगितले की दुपारी १२ ते ४ या वेळेत थेट उन्हात जाणे टाळावे आणि शक्यतो सावलीत राहावे. तसेच अंग झाकणारे कपडे घालावेत आणि सनस्क्रीनचा वापर करावा, ज्यामुळे उष्णता आणि डिहायड्रेशनपासून संरक्षण मिळते.

त्यांनी आणखी काही टिप्स देताना सांगितले की पाणी पिण्याची आठवण करून देणारे अलार्म किंवा ॲप्स वापरा आणि 8×8 नियम पाळा, म्हणजे दररोज ८ वेळा, प्रत्येकी सुमारे १ ग्लास इतके पाणी प्या. म्हणजेच साधारण ८ ग्लास पाणी रोज पिण्याचा सल्ला दिला जातो. एकदम खूप पाणी पिण्यापेक्षा दिवसभर थोडे-थोडे पाणी पिणे अधिक चांगले आहे.

“कलिंगड, काकडी, संत्री आणि स्ट्रॉबेरी यांसारखे पाण्याचे प्रमाण जास्त असलेले पदार्थ आहारात घ्या. तसेच सूप, स्मूदी आणि ताज्या फळांच्या रसाचाही समावेश करा. हे पदार्थ शरीराला थंड ठेवण्यासोबतच आवश्यक जीवनसत्त्वे आणि खनिजेही देतात,” असे त्यांनी सांगितले.

“साध्या पाण्याला चव आणायची असेल तर इलेक्ट्रोलाइट्सने भरपूर असलेले नारळपाणी किंवा कॅमोमाइल व ग्रीन टीसारखे हर्बल चहा प्या, ज्यात अँटीऑक्सिडंट्स असतात,” असे डॉ. बसवराज यांनी सांगितले. फळे, पुदिना किंवा काकडी घालून तयार केलेले फ्लेवर्ड पाणी चविष्ट लागते आणि पोषक घटकही देते. तसेच ताक आणि फळांचे रस शरीराला हायड्रेट ठेवून ताजेतवाने ठेवतात, असेही त्यांनी सांगितले.